काठमाडौं । महानगरपालिकाका मेयर बालेन्द्र शाह (बालेन)ले पदबाट राजीनामा दिएका छन्। शाहले उपप्रमुखलाइ राजीनामा बुझाएका हुन्।
२१ फागुनमा हुने प्रतिनिधिसभा सदस्यकाे निर्वाचनमा उम्मेदवारी दिनका लागि शाहले मेयर पदबाट राजीनामा दिएका हुन्। उनले झापा क्षेत्र नम्बर ५ मा पूर्वप्रधानमन्त्री तथा एमाले अध्यक्ष केपी ओलीसँग प्रतिस्पर्धा गर्ने तयारी गरेका छन्।
राजीनामा दिने निर्धारित तालिका रहेपनि यसअघि केहिबेर अलमल भएको थियो। तर, बाँकी चुनावी तयारीमा आफूलाई केन्द्रीत गराउन उनले आजै राजीनामा दिएका बताइएकाे छ।
‘उहाँले राजीनामा दिइसक्नु भएको छ, विहानसम्म त आज नदिने कि भन्ने थियो, तर चुनावमा केन्द्रित हुनको लागि आजै दिँदा सजिलो हुने भएकोले आज नै राजीनामा दिनुभयो,’ मेयर शाहका सचिवालयका एक सदस्यले भने, ‘रास्वपाको बैठकमा जानुअघि उहाँले राजीनामा दिनुभएको हो ।’
काठमाडौं महानगरका सहप्रवक्ता धुव्र काफ्लेले केहि समयअघि मेयरको सचिवालयले उपप्रमुखको कार्यकक्षामा ल्याएर राजीनामा पत्र बुझाएको पुष्टी गरे। ‘संविधानको धारा २१६ को उपधारा ८ बमोजिम उपप्रमुखलाई राजीनामा बुझाउनु भएको हो,’ काफ्लेले भने, ‘राजीनामा उपप्रमुखज्यूकोमा दर्ता भएको छ।’
राजीनामा बुझाउन मेयर शाह आफैँ भने उपस्थित थिएनन्।
