छोरीलाई दाइजो होइन शिक्षा दिनुपर्छ राजपा नेता: यादव

(एबिसी संचार)
सिरहा माघ १२ राष्ट्रिय जनता पार्टी (राजपा) नेपालका अध्यक्षमण्डलका सदस्य एवं संघीय सांसद राजकिशोर यादवले समाजिक रुपान्तरणको जिम्मेवारी सबैमा बोध हुनुपर्ने बताएका छन् ।
सिरहाको मिर्चैयास्थित मोहन उमाविको प्रांगनमा आइतबार आयोजित झोला तथा सेनेटरी प्याड वितरण कार्यक्रमलाई सम्बोधन गर्दै नेता यादवले यस्तो बताएका हुन् । उनले समाजमा छोरीमाथिको फरक नजरिया अझ कायमै रहेको भन्दै यसलाई बदल्न समाज नसच्चिएर नहुने धारणा राखे ।
नेता यादवले समाज र घरघरबाट महिला हिंसाको अन्त्यका लागि छोरीलाई दाइजो नभई शिक्षा दिइनुपर्ने बताए । उनले भने, ‘छोरीलाई दाइजो दिनैपर्ने मानसिकता बदलौं, यो घोर अपराध हो, छोरीलाई शिक्षा दिऔं, तबमात्र समाजिक रुपान्तरण सम्भव छ, यो जिम्मेवारी सबैमा बोध हुनुपर्छ ।’
मुलुर र समाजको समग्र विकासको मुल आधार नारी सशक्तिकरण रहेको बताउँदै उनले समाजमा परिवर्तनको लागि महिला सशक्तिकरण आवश्यक रहेको बताए । ‘मानिसको व्यक्तित्व विकासका लागि महत्वपूर्ण पक्ष भनेको शिक्षा हो, जसले हाम्रो भविष्य तथा लक्ष्यलाई कोर्न सक्छ, शिक्षाले महिलालाई एउटा ठूलो मान्छे बनाएर विश्वभरमा चिनाउने र सबैबाट सम्मान दिलाउन सक्छ, साथमा आत्म निर्भर बनाउने र आफ्नो जीवनस्तरलाई सहज अनि सुविस्ता बनाउन सहयोग गर्छ, त्यसैले अब यसतर्फ अगाडि बढौं’, उनले भने ।
नेता यादवले जगत जननी माता सिता, लक्षमी र सरस्वतीको प्रसंग जोड्दै यहाँको संस्कार र संस्कृति आफैंमा ऐतिहासिक रहेको भन्दै यसको रक्षाको लागि सबैले जिम्मेवारी बहन गर्नुपर्ने तर्क गरे । उनले प्रदेश २ सरकारले नारी हितको लागि ‘बेटी पढाउ, बेटी बचाउ’ अभियान सञ्चालन गरेकोप्रति प्रदेश सरकारलाई धन्यवादसमेत दिए ।
यस्तै, मिर्चैया नगरपालिकाका नगरप्रमुख श्रवण यादवले समाज बदल्नको लागि सरकार लागिपरेको बताउँदै यसमा स्थानीय तहबाट आफूहरु थप मलजल गरेर अघि बढिरहेको बताए । उनले नगरमा शिक्षाको स्तर उकास्न अहोरात्र प्रयासमा रहेको जनाए ।
प्रदेश २ सरकारको महात्वाकांक्षी योजनामध्ये एक ‘बेटी पढाउ, बेटी बचाउ’ अभियान अन्तर्गत मोहन उमाविमा आइतबार झोला एवं सेनेटरी प्याड वितरण गरिएको छ । सो विद्यालयमा कक्षा ७ मा अध्ययनरत एकसय ८ जना छात्राहरुलाई झोला तथा सिरहाका विभिन्न पाँच विद्यालयलाई सेनेटरी प्याड हस्तान्तरण गरिएको हो ।
कार्यक्रममा सांसद राजकिशोर यादव, मिर्चैया नगरपालिका नगरप्रमुख श्रवण यादव, प्रदेश सांसद दिलीप साह, शिक्षा निर्देशनालय प्रदेश २ का प्रमुख लगायतको सहभागिता थियो ।