सागर थापा/महेन्द्र सिंह
बाँके माघ १७ नेपाल र भारतका अधिकारीहरुले हराएको पिलरको विषयमा छलफल गरेका छन् ।
भारतको नानपारामा भएको सीमावर्ती जिल्लाका अधिकारीहरुको बैठकले हराएको ठाउँमा पिलर राख्ने, जीर्ण भएकालाई मर्मत गर्ने विषयमा छलफल गरेका हुन् ।
बाँके, बर्दिया र दाङ तथा भारतको बहराइच र श्रावस्तीका अधिकारीहरु बैठकमा थिए । दाङका प्रमुख जिल्ला अधिकारी गोबिन्द रिजालले सीमा स्तम्भ व्यवस्थित गर्ने कुरामा छलफल भएको जानकारी दिनुभयो । बाँकेको मात्रै भारतसँग ६५ किलोमिटर सीमा क्षेत्र पर्छ । त्यहाँ मुख्य र सहायक गरी ३ सय ७ वटा पिलर छन् । ३२ वटा मुख्यमत्तये चार वटा खोलाले बगाएको छ भने एउटा मर्मत गर्नुपर्ने अवस्थामा पुगेको छ । २ सय ७५ वटा सहायक पिलरमध्ये १८ वटा मर्मत गर्नुपर्ने, दुई वटा पुननिर्माण गर्नुपर्ने अवस्थामा रहेका छन् । ५ वटा सहायक पिलर खोलाले बगाएको छ ।
नेपाल र भारतका संयुक्त टीमले केही महिनादेखि दशगजाको सर्वे गरिरहेको छ । बैठकमा फिल्ड सर्वे टीमका सदस्यको उपस्थिति थियो ।
बैठकमा बाँके, बर्दिया र दाङका प्रमुख जिल्ला अधिकारी सशस्त्र, प्रहरी नेपाल प्रहरी र अनुसन्धानका एसपी, वन र नापी कार्यालयका प्रतिनिधि सहभागी रहेको दाङका प्रमुख जिल्ला अधिकारी रिजालले जानकारी दिनुभएको छ ।
