काठमाडौं । फोटोमा तत्कालीन आईजी उपेन्द्रकान्त अर्यालसहित जेन–जी आन्दोलन जाँचबुझ आयोगका प्रवक्ता विज्ञानराज शर्मा, हालै गठित सम्पत्ति छानवीन आयोगका सदस्य गणेश केसी (तत्कालीन डीआईजीहरु) र हाल लुम्बिनी प्रदेशका डीआईजी भूपेन्द्र खत्री पनि देखिएका कारण सोधखोज बढी भएको बुझेँ ।
त्यसबेला (विसं २०७१) म माननीय उपप्रधान तथा गृहमन्त्री वामदेव गौतमको प्रेस संयोजकको जिम्मेवारीमा थिएँ । हामी जिल्ला प्रहरी कार्यालय, अर्घाखाँचीको नवनिर्मित भवन उद्घाटन गर्न नेपाली सेनाको एआई १७ हेलिकप्टरबाट सन्धीखर्क पुगेका थियौँ । उद्घाटन र खाना खाने कार्यक्रमपछि काठमाडौं फर्किने पूर्वनिर्धारित कार्यक्रम थियो । तर, त्यहाँसम्म पुगेपछि वामदेव कमरेडले आफ्नो गृहजिल्ला तथा निर्वाचन क्षेत्र प्यूठान जाने मन गर्नुभयो । र, हेलिकप्टर सीधै प्यूठान लाग्यो । त्यहाँ सांसदका रुपमा वामदेव कमरेडको सम्पर्क कार्यालय उद्घाटन गर्ने कार्यक्रम थियो । आईजीपी उपेन्द्रकान्त अर्यालको शर्त थियो, स्वर्गद्वारी पुगिन्छ भने जाऔँ । त्यसैले सम्पर्क कार्यालय उद्घाटनलगत्तै हामी प्रसिद्ध धार्मिकस्थल स्वर्गद्वारीतर्फ सोझियौँ । स्वर्गद्वारीबाट फर्किनका लागि हेलिकप्टर चढ्नुअघि यो फोटो खिचिएको हो । यसमा हाल नेकपा एमाले, प्यूठान जिल्ला कमिटीका अध्यक्ष विजयविराज विष्ट पनि हुनुहुन्छ । उहाँ र म वामदेव कमरेडको सचिवालयमा थियौँ ।
तर, शत्रुले चारैतिरबाट घेरेको उक्त अवस्थामा सो यात्राबारे अनेकन अनर्गल हल्ला फैलाइयो । ‘गृहमन्त्री २० लाख खर्च गरेर गृहजिल्ला गए’, ‘सेनाले ३ घण्टाका लागि प्रतिघण्टा ४ लाख ९७ हजार २ सय ५० रुपैयाँ भाडामा दिएको हेलिकप्टर गृहमन्त्रीले दिनभरि होल्ड गरे’ जस्ता अफवाह फैलाइयो । गृह मन्त्रालयले रकम भुक्तानी गर्ने गरी त्यसदिन हेलिकप्टर प्रयोग भएको थियो । र, प्रतिघण्टाको हिसाब थिएन । फ्युलसहित केही सर्भिस चार्जमा गृहलाई सेनाले हेलिकप्टर दिने गरेको थियो । नढाँटी भनौँ, प्रहरीका ‘सा’बहरु’ वामदेवको बदनाम गर्न उक्त कालखण्डमा साह्रै सक्रिय हुनुहुन्थ्यो । समाचारको प्लटिङ त्यसरी नै भएको थियो ।
