काठमाडौं । स्थानीय बजारमा केराको मूल्य निरन्तर बढ्दै गएको छ। कालीमाटी फलफूल तथा तरकारी बजार विकास समितिका अनुसार बुधबार थोक बजारमा केराको मूल्य प्रतिदर्जन अधिकतम ३०० रुपैयाँ पुगेको छ।
समितिको तथ्यांकअनुसार बुधबार थोक बजारमा केरा प्रतिदर्जन न्यूनतम २००, अधिकतम ३०० तथा औसत २५० रुपैयाँमा कारोबार भइरहेको छ। यो अघिल्लो दिनको तुलनामा औसत २५ रुपैयाँले बढी हो। मंगलबार केरा प्रतिदर्जन न्यूनतम २००, अधिकतम २५० र औसत २२५ रुपैयाँमा कारोबार भएको थियो।
थोक बजारमै मूल्य बढेसँगै खुद्रा बजारमा उपभोक्ताले अझ बढी मूल्य तिर्नुपर्ने अवस्था सिर्जना हुने देखिएको छ। व्यवसायीका अनुसार भारतबाट केराको आयात रोकिएपछि स्थानीय उत्पादनको माग बढेको छ। किसानले बारीबाटै महँगो मूल्यमा केरा बिक्री गर्न थालेपछि त्यसको प्रत्यक्ष असर बजार मूल्यमा परेको उनीहरूको भनाइ छ।
