काठमाडौं । गत फागुन २१ गते सम्पन्न प्रतिनिधि सभा निर्वाचनबाट एकल बहुमत ल्याएको राष्ट्रिय स्वतन्त्र पार्टी (रास्वपा)का वरिष्ठ नेता वालेन्द्र शाह प्रधानमन्त्री भएपछि एकपछि अर्को गरी कर्मचारीहरूको मान मर्दन गर्ने काम भइरहेको छ ।
मुख्यगरी सरकारका मन्त्री, प्रधानमन्त्री शाहको सचिवालय र सत्तारुढ दल रास्वपाका सांसदहरूबाट स्थायी सरकार (निजामती कर्मचारी)को मानमर्दन गर्ने काम भइरहेको छ ।
संघीय संसद् अन्तर्गतको प्रतिनिधि सभाको सार्वजनिक लेखा समितिको बुधबारको बैठकमा सत्तारुढ दल रास्वपाका सांसद खगेन्द्र सुनार म्यादी प्रहरी र प्रहरीको पोसाक खरिदमा अनियमितता भएको आरोप लगाउँदै गृहसचिव राजकुमार श्रेष्ठ र नेपाल प्रहरीका महानिरीक्षक दानबहादुर कार्कीविरुद्ध खनिए । सुनारले प्रहरीमा जुत्ता, मोजा, कपडालगायतका सामग्री खरिदमा अनियमितता भएको आरोप लगाउँदै छानबिनको मागमात्रै गरेनन्, प्रहरी महानिरीक्षक (आईजीपी) कार्कीमाथि समेत प्रश्न उठिसकेको भन्दै पदबाट अलग गरेर छानबिन गर्नुपर्ने बताए ।
‘सामान खरिदमा भ्रष्टाचार गर्ने, जुत्ता खरिदमा भ्रष्टाचार गर्ने, अरु त अरु लठ्ठी (भाटा) खरिदमा भ्रष्टाचार गर्ने । भाटा खरिदमा भ्रष्टाचार हुन्छ भन्ने त्यो भाटाले कसलाई हान्ने हो फेरि ? भ्रष्टाचार गरेर खरिद गरेको भाटाले जनतालाई हान्न पाइँदैन,’ समिति बैठकमा सुनारले भने ।
सुनारले प्रहरीका तल्लो तहका कर्मचारीको हकसमेत भ्रष्टाचारले खोसिएको आरोप लगाउँदै थपे, ‘एउटा गरिबको छोरा सिपाही भएर आएको छ । उसको जुत्ता खाइदिने, कट्टु खाइदिने, मोजा खाइदिने, उसका लुगा–कपडा खाइदिने अवस्था भएको छ ।’
भ्रष्टाचारविरुद्ध लड्न जनताले आफूहरूलाई संसदमा पठाएको भन्दै उनले यस्तो विषयमा मौन बस्न नसक्ने बताए । उनले अख्तियार दुरुपयोग अनुसन्धान आयोगको अनुसन्धानमा समेत प्रश्न उठाए । ‘धामीको मुद्दा धामीले, कामीको मुद्दा कामीले, कार्कीको मुद्दा कार्कीले गर्न पाइँदैन । त्यसैले विशेष खालको समिति बनाएर स्पष्ट ढंगबाट छानबिन गर्नुपर्छ,’ सुनारले भने ।
सुनारले आईजीपी कार्कीमाथि मात्रै होइन, त्यही प्रकरणमा गृहसचिव श्रेष्ठमाथि पनि औँला ठड्याए । बैठकमा आधा घण्टा ढिलो उपस्थित भएको भन्दैसमेत सुनार सचिव श्रेष्ठमाथि खनिए । समिति बैठकमा सचिव श्रेष्ठ र आईजीपी कार्कीले नेपाल प्रहरीको खरिद प्रक्रियामा कुनै पनि किसिमको आर्थिक अनियमितता वा भ्रष्टाचार नभएको प्रष्टीकरण दिए ।
