नवलपरासी । नवलपुर बाढीपछि नारायणीमा भेटिएका दर्जनौं शवको पहिचान गर्न र व्यवस्थापन गर्न चुनौती भएपछि जिल्ला प्रहरीले जमिनमुनि अस्थायी रूपमा शव संरक्षण* गर्न थालेको छ।
जिल्लामा कोल्ड स्टोरेज र अस्पतालको क्षमताले नधान्ने भएपछि शवहरुलाई वैज्ञानिक तरिकाले जमिनमा संरक्षण गर्ने विधि अपनाइएको हो।
कसरी गरिँदैछ संरक्षण?
शवलाई प्लास्टिक र सेतो कपडाले बेरेर, पहिचानको लागि ट्याग नम्बर लगाएर, ६ फिट गहिरो खाल्डोमा चुन र नुन प्रयोग गरेर राखिएको छ। जसले गर्दा शव केही दिनसम्म नकुहिने र पहिचान गर्न सजिलो हुने प्रहरीको भनाइ छ।
यस विषयमा नवलपुरका एसएसपी श्यामकृष्ण अधिकारीको भनाइ हामीसँग अहिले धेरै शवहरू छन्, सबैको एकैपटक पोस्टमार्टम र पहिचान सम्भव छैन। शवलाई सम्मानपूर्वक राख्न र पछि परिवारले चिन्न सकोस् भनेर हामीले अस्थायी संरक्षणको यो विधि अपनाएका हौँ। प्रत्येक शवको फोटो, हुलिया, कपडा र ट्याग नम्बर सुरक्षित राखेका छौं। आफन्तले सम्पर्क गरेपछि हामी तुरुन्त देखाउन सक्छौं। यो बेवारिसे गाड्ने होइन, संरक्षण गरेर राख्ने प्रक्रिया हो।”
प्रहरीले सबै शवको विवरण सहितको सूची सार्वजनिक गर्ने र आफन्तको DNA परीक्षणपछि मात्र अन्तिम संस्कार गरिने जनाएको छ।
