पर्सा । वीरगञ्ज नारायणी अस्पतालको प्रसूति वार्डबाट चोरी भएको एक दिने नवजात शिशुलाई प्रहरीले ६ घण्टामै सकुशल उद्धार गरेको छ।
आइतबार दिउँसो अस्पतालबाट बच्चा हराएको सूचना पाउनासाथ जिल्ला प्रहरी कार्यालय पर्साका एसपी पवन भट्टराईको कमाण्डमा विशेष टोली परिचालन भएको थियो ।
यसरी भएको थियो उद्धार
सूचना पाउनासाथ अस्पतालको सबै सीसीटीभी फुटेज नियन्त्रणमा लिइयो।
अस्पतालका सबै नाका सिल गरी चेकजाँच कडा पारियो।
फुटेजमा बच्चा बोकेर हिँडेकी एक महिलाको पहिचान भयो।
प्राविधिक विश्लेषण र सुराकीको आधारमा ती महिलाको लोकेशन वीरगञ्जकै छेउमा रहेको पत्ता लाग्यो।
एसपी भट्टराईको निर्देशनमा खटिएको सादा पोशाकको टोलीले उनलाई पक्राउ गरी बच्चा सकुशल उद्धार गरेको हो।
पक्राउ परेकी महिलामाथि थप अनुसन्धान भइरहेको र बच्चालाई आमा-बुबाको जिम्मा लगाइएको प्रहरीले जनाएको छ। छिटो र चुस्त तरिकाले उद्धार गरेको भन्दै स्थानीयले पर्सा प्रहरीको प्रशंसा गरेका छन्।
