काठमाडौँ । पहिरोले पृथ्वी राजमार्गअन्तर्गत धादिङको कृष्णभीर सडक खण्ड अवरुद्ध भएपछि वैकल्पिक मार्गबाट पेट्रोलियम पदार्थ, खाद्यान्न, तरकारी, औषधिलगायत अत्यावश्यक उपभोग्य वस्तु आपूर्ति भइरहेको छ । पेट्रोलियम पदार्थर् त्रिभुवन राजपथबाट ल्याउने व्यवस्था गरिएको छ । एलपी ग्यास हेटौंडा–बारा–चितवन हुँदै सोही बाटोबाट नै काठमाडौं भित्र्याइएको छ ।
तोकिएको वैकल्पिक बाटोअन्तर्गत ठूला यात्रुवाहक तथा मालवाहक सवारीसाधनले काठमाडौं आउँदा त्रिभुवन राजपथ र फर्किंदा कान्ति लोकपथ प्रयोग गर्नुपर्ने व्यवस्था गरिएको छ । १४ सिटभन्दा कम क्षमताका सवारीसाधन काठमाडौं आउँदा भीमफेदी–कुलेखानी–सिस्नेरी–दक्षिणकाली हुँदै काठमाडौं आइपुग्छन् । हेटौंडा फर्किंदा ती सवारीसाधनले फर्पिङ–फाखेल–कुलेखानी–भीमफेदी सडक प्रयोग गर्नुपर्नेछ ।
नेपाल आयल निगमका कार्यकारी निर्देशक नगेन्द्र साहले मुख्य राजमार्ग बन्द भए पनि पेट्रोलियम पदार्थको आपूर्तिमा कुनै समस्या नरहेको बताएका छन् । पेट्रोल पाइपलाइनमार्फत अमलेखगन्जसम्म आउने र काठमाडौंको दूरी छोटो भएकाले वैकल्पिक बाटो त्रिभुवन राजपथ प्रयोग गरिएको छ । निगमका अनुसार पेट्रोलियम पदार्थ बोकेका ट्यांकर हेटौंडा–भैंसे–पालुङ–नौबिसे हुँदै काठमाडौं भित्रिएका छन् ।
