पर्वत फागुन ३ जलजला गाउँपालिका वडा नं. ३ वारी बेनीस्थित कालीगण्डकी किनारमा आयोजित महोत्सव अवलोकनका लागि गएका एक बालकलाई शनिबार दिउँसो कालीगण्डकी नदिले बगाएको छ ।
पर्वतमा सञ्चालित सामुदायिक रेडियो दिदीबहिनीले आयोजना गरेको महोत्सव हेर्ने गएका म्याग्दीको धौलागिरि गाउँपालिका वडा नं. १ गुर्जाका अन्दाजी ९ वर्षका शिशिर छन्त्याललाई कालीगण्डकी नदीले बगाएको हो ।
नदिले बगाएर झण्डै १ सय मिटर तल पुर्याएका बालकलाई तत्काल सुरक्षाकर्मीको सहयोगमा उद्धार गरिएको थियो । बालकको हात खुट्टामा चोटपटक लागेको प्रहरीले जनाएको छ । उनको म्याग्दी स्थित बेनी अस्पतालमा उपचार भइरहेको छ । महोत्सव स्थलकै डिलतिर खेलिरहेका बालक एक्कासी नदिमा खसेपछि बगाएको हो ।
जिल्ला प्रहरी कार्यालय पर्वतका प्रहरी निरीक्षक विकास थापाका अनुसार सुरक्षाकर्मीले बगाएको पाँच-सात मिनेटमै उद्धार गरेका कारण बालकको ज्यान बचाउन सफल भएको हो ।
नदि किनारमै गरिएको उक्त महोत्सव सुरक्षाका दृष्टिकोणले संवेदनशील रहेको छ । पटक-पटक जिल्ला सुरक्षा समितिको बैठकले उक्त स्थानमा महोत्सव गर्न अस्वीकृत गरे पनि पूर्व सांसदसमेत रहेकी रेडियोकी अध्यक्ष चापागाईँले अटेर गरेरै महोत्सव आयोजना गरेकी हुन् ।
सुरक्षा समितिको बैठकले उक्त ठाउँको विकल्प खोज्न आग्रह गरेको थियो । नदि किनारमै संचालन गरिएको र अझै दर्शकहरूका लागि डुंगा शयरकोसमेत आकर्षण रहेकाले अझै दुर्घटना बढ्न सक्ने देखिएको हो ।
