काठमाडौँ विश्वभर कोरोना भाइरसको प्रकोप बढेसँगै संयुक्त राष्ट्रसंघीय शान्ति मिसनअन्तर्गत छनोट भएर त्यसतर्फ जाने तयारीमा रहेका सुरक्षाकर्मी रोकिएका छन् । नेपाली सेना, नेपाल प्रहरी र सशस्त्र प्रहरीबाट मिसन जाने तयारीमा रहेका सबै सुरक्षाकर्मीलाई राष्ट्रसंघको आग्रहमा रोकिएका हुन् । नेपाली सेनाबाट राष्ट्रसंघको दक्षिण सुडानमा तैनाथ युनाइटेड नेसन्स मिसन इन साउथ सुडान (अनमिस) अन्तर्गत तैनाथ हुन लागेको करिब सात सय जना सम्मिलित गण तहको फौज रोकिएको छ । त्यस्तै अनमिसका लागि प्रहरीबाट युनाइटेड नेसन्स पुलिस (अनपोल) अन्तर्गत छनोट भएका अधिकृतस्तरका १७ जनाको टोली पनि अर्को निर्णय नभएसम्म जान पाउने छैनन् । सशस्त्र प्रहरीका अधिकृतको पनि मिसन यात्रा दुई महिना धकेलिएको छ । सशस्त्र प्रहरी महानिरीक्षक शैलेन्द्र खनालले हाल मिसनमै तैनाथ कर्मचारीको बसाइ दुई महिना थप भएकाले तत्काल नेपालबाट जान रोकिएको बताए । ‘कोरोना भाइरसको प्रकोप न्यूनीकरणअन्तर्गत मिसनमा कार्यरतको म्याद दुई महिना थप भएको हो,’ खनालले भने, ‘दुई महिनापछिको अवस्था के हुन्छ, त्यसपछि मात्रै यताबाट जाने वा स्थगनको निर्णय यथावत् हुने भन्नेबारे निर्णय हुन्छ ।’ कोरोनाको असरले इटाली, भियतनाम र इन्डोनेसियाका लागि तय भएको नेपाल प्रहरीको विशेष तालिम पनि रद्द गरिएको छ । प्रहरी प्रवक्ता शैलेश थापा क्षत्रीका अनुसार इटाली र इन्डोनेसियाका १र१ र भियतनामका लागि दुईवटा तालिम रद्द गरिएको छ ।
