काठमाडौं सरकारले लकडाउन बैसाख २५ गतेसम्म लम्ब्याउने निर्णय गरेको छ। आइतबार साँझ बसेको मन्त्रिपरिषद्को बैठकले लकडाउन लम्ब्याउने निर्णय गरेको हो। उच्चस्तरीय समन्वय समितिले १ हप्ता बढाउन सिफारिस गरेपनि सरकारले लकडाउन १० दिन थप गरेको छ। पछिल्लो समय जारी गरेको लकडाउनको समयसीमा भोलि सकिँदै छ। लकडाउनले गर्दा कोरोना नियन्त्रणमा सफल भएको निष्कर्ष निकाल्दै विगत ३४ दिनदेखी जारी लकडाउनलाई सरकारले निरन्तरता दिएको हो। कोरोना रोकथामका लागि भन्दै सरकारले पहिलो पटक गत चैत ११ गते लकडाउन आदेश जारी गरेको थियो। त्यसयता सरकारले आइतबार चौथोपटक लकडाउनको अवधि लम्ब्याउने निर्णय गरेको हो। यसअघि सरकारले जेठ २ गतेसम्म आन्तरिक तथा बाह्य हवाई उडान बन्द गर्ने निर्णय गरिसकेको छ। यसअघि सरकारले पछिल्लोपटक १५ दिन लकडाउन लम्ब्याएको थियो। कोरोना विरुद्ध लकडाउनलाई मात्रै सरकारले हतियारको रुपमा प्रयोग गर्दै गएको छ। कोरोना नियन्त्रणका लागि परिक्षणको दायरा बढाउनुपर्ने, जोखिम कम भएको ठाँउमा खुकुलो बनाउँनुपर्ने माग उठेपनि त्यसतर्फ ध्यान जान सकेको छैन। लकडाउनका कारण मजदुरवर्गमा निकै समस्या भएको छ। सरकारले राहतको व्यवस्था गर्न सकेको छैन।
