सागर थापा
जिल्ला प्रशासन कार्यालय दाङले जिल्लामा लकडाउनमा थप कडाई गर्न थालेको छ । मंगलवारको सुरक्षा समितिको बैठकले अबदेखि बेलुका ७ बजेदेखि विहान ५ बजेसम्म पास भएपनि सवारी चलाउन नदिने निर्णय गरेको छ । ‘अत्यावश्यक सवारी साधन बाहेक अब पास भएपनि त्यो समयमा कसैका गाडी गुड्न नदिने निर्णय भएको छ। जिल्ला प्रहरी कार्यालय दाङका प्रहरी प्रमुख एसपी गणेश चंन्दका अनुसार दाङमा पासको बाहानामा मानिसहरु रातको समयमा जथाभावी हिडडुल गर्न लागेको पाइएपछि यस्तो निर्णय गर्नु परेको हो ।’
पछिल्लो समय छिमेकी जिल्ला बाँकेमा ह्वात्तै कोराना संक्रमित बढेपछि दाङमा लकडाउनमा कडाई गर्न थालिएको छ । प्रहरीले सहर बजारमा बिना काम हिड्नेलाई लाठी समेत लगाउन थालेको छ । अत्यावश्यक काम नपरी सडकमा हिड्नेलाई सडकमै दिनभर होल्ड गर्ने र बेलुकी पख प्रशिक्षण दिएर छोड्न दिएको छ । मंगलवार जिल्लामा १ सय ८१ जनालाई सडकमै होल्ड गरि प्रशिक्षण दिएर छोडिएको दाङ प्रहरी प्रमुख एसपी चंन्दले बताए ।
त्यसैगरी जिल्लाका विभन्न स्थानमा गरि ८० वटा सवारी साधनलाई नियन्त्रणमा लिइएको छ । विश्भर महामारीको रुपमा फैलिएको कोरोना भाइरसको संक्रमणवाट बच्न सरकारले चैत ११ गतेदेखि देशभर लकडाउन सुरु गर्दा सुरुका दिनहरुमा प्रहरीले त्यसैगरी सवारी साधन नियन्त्रणमा लिने गरेको थियो । तर यो बीचमा सवारी साधन नियन्त्रणमा लिने क्रम लगभग बन्द भइसकेको थियो । मानिसहरु पनि सडकमा लडकडाउन उलंघन गर्दै हिडिरहेका देखिन्थे । तर अबदेखि फेरि कडाई गर्ने संकेत जिल्ला प्रशासन दाङ र जिल्ला प्रहरीले दिएको छ ।
