एबिसी संचार बर्दियाको क्वारेन्टाइनमा आईतवार राती आत्महत्या गरेका ती व्यक्तिको कोरोना परीक्षण गर्दा रिपोर्ट पोजेटिभ आएको थियो ।
रिपोर्ट पोजिटिभ आएपछि नेपाली सेनाको भैरबप्रसाद गणको सुरक्षा गुल्म तुलापुरबाट सहसेनानी राधेश्याम विष्टको कमाण्डमा खटेको सेनाको टोलीले सो शव व्यवस्थापन गरेको हो । पीसीआर रिपोर्ट नआउँदासम्म उनको शव झुण्डिए कै अवस्थामा रहेको थियो ।
अछाम घर भएका ४३ वर्षीय पुरुष भारतबाट कैलाली हुदै बर्दिया आएका थिए । स्थानीयबासीका अनुसार अछाम जाने अवस्था नभएपछि उनी सामान्य नाता पर्ने बर्दियाको ठाकुरबाबा नगरपालिकाको सैनवारमा पुगेका उनलाई ठाकुरबाबा नगरपालिकाकाले क्वारेन्टिनमा लगेर राखेको थियो । क्वारेन्टिनमा रहेको तन्नाको पासो लगाएर उनले आत्महत्या गरेका थिए ।
आत्महत्या भएको खबर पाए लगत्तै कोरोना संक्रमण भए नभएको पत्ता लगाउन उनको स्वाब नेपालगन्ज स्थित भेरी अस्पतालमा परीक्षणका लागि ल्याइएको थियो । सोमबार अबेर साँझ उनमा कोरोना भाइरस पोेटिभ पाइएपछि नेपाली सेनाको टोलीले सोमबार राती नै उनको शव व्यवस्थापन गरेको हो ।
नेपाली सेनाको टोलीले उनको शवलाई अन्तिम सलामी दिदै सम्मानका साथ शव व्यवस्थापन गरेको थियो । कोबिड–१९ को संक्रमणको कारण मृत्यु भएकाहरुको शव नेपाली सेनाले सम्मानका साथ व्यवस्थापन गर्दै आएको छ ।
