तेज वली तुल्सीपुर दशैं तिहारका लागि भनेर ४ सय खसी-बोका काठमाडौं पठाएको छ । ५५० रुपैंया प्रतिकिलोका दरले खरिद गरि शनिबार दुई सय र आइतबार दुई सय गरि चार सय खसी-बोका पठाइसकेको खाद्य व्यवस्था तथा व्यापार कम्पनी तुलसीपुरका प्रमुख माधव मिश्रले बताए ।
प्रमुख मिश्रका अनुसार आज थप दुई सय खसी बोका पठाउने तयारी छ । ‘ हामीले जिल्लाबाट प्रतिकेजी ५५० रुपैंयामा खरिद गरेर पठाएका छौं, केन्द्रमा प्रति केजी ५६० रुपैंया बिक्री दर तोकेको छ,’ उनले भने‘ तर, १० रुपैंया छुट पनि दिएको छ । दुवानी खर्च नेपाल सरकारले यस पटक अनुदान दिन्छ होला ।’
जिल्लाबाट केन्द्रमा पठाउदाको दुवानी खर्च यस पटक नेपाल सरकारले दिने समेत उनले बताए । त्यस्तै, सरकारी स्वमित्वको खाद्य व्यवस्था तथा व्यापार कम्पनीले आजबाट सहुलियत मूल्यमा खसी-बोका बिक्री सुरु गरेको छ । दशैंलाई लक्षित गरी थापाथलीस्थित बिक्री केन्द्रबाट सोमबार बिहान ८ बजेदेखि खसी-बोका बिक्री सुरु गरिएको कम्पनीकी सूचना अधिकारी शर्मिला सुवेदीले जानकारी दिइन् ।
कम्पनीको आइतबार बसेको बैठकले जिउँदो खसी तथा बोकाको प्रतिकिलो ५६० रुपैयाँ तोकेको छ । जसमा प्रतिकिलो १० रुपैयाँ छुट दिएर ५ सय ५० रुपैयाँमा खसी-बोका बिक्री गरिने सुवेदीले बताइन् । खसी-बोकाको जिउँदो मूल्य समान भएको र सो मूल्य गत वर्ष जतिकै भएको कम्पनीले जनाएको छ ।
