(महेन्द्र सिंह)
बाँके । राप्ती सोनारी गाउँपालिकाको वडा नम्बर ५ बाट प्रहरीले ४ थान हतियारसहित एक जना नेतालाई पक्राउ गरेको छ।
अवैध हतियार राखिएको बिशेष सूचनाका आधारमा इलाका प्रहरी कार्यालय कोहलपुर र इलाका प्रहरी धामपुरबाट गएको प्रहरी सहायक निरीक्षक फत्ते थारुको कमाण्डको टोलीले आज बिहान ९ बजे राप्ती सोनारीको बिनौना नजिक जबरपुरबाट फरक फरक घरमा लुकाएर राखेको अवस्थामा १ थान बारबोर, २ थान भरुवा बन्दुक र १ थान पेस्तोल बरामद गरेको ईलाका प्रहरी कार्यालय कोहलपुरका प्रहरी प्रमुख डिएसपी रबिन्द्र खनालले जानकारी दिएका छन्।
हतियारसंगै पक्राउ पर्नेमा ६८ बर्षका ॠषिराम थारु रहेको प्रहरी नायब उपरीक्षक खनालले जानकारी दिएका छन्। पक्राउ परेका थारुको घरबाट २ थान भरुवा बन्दुक बरामद गरेको छ भने उनका छोरा ओमप्रकाश थारुको घरबाट १ थान बारबोर बरामद गरेको प्रहरी नायब उपरीक्षक खनालले बताए।
त्यस्तै ॠषिरामका भाई लालबहादुर थारुको घरबाट एक थान कटुवा पेस्तोल बरामद गरेको छ। प्रहरीले भाई लालबहादुरको घरबाट १ केजी बारुद , खोका ५० वटा, ३ थान जरायोको सिङ्ग ,बदेलको दात १० वटा, चितलको दात ४ वटा र दुम्सिको प्वाँख बरामद गरेको खनालले भने। खनालका अनुसार ॠषिरामका छोरा र भाई फरार रहेका छन्।
पक्राउ परेका थारु वैध निकट माओवादी पार्टीमा आबद्द रहेका छन्। थारु गाउँपालिका अध्यक्ष पद र प्रदेश सभा निर्बाचनमा १ नम्बरमा उम्मेदवार बनेका थिए।
प्रहरी प्रमुख डिएसपी खनालका अनुसार उनी खुंखार शिकारी भएको आशंका रहेको छ।
