ABC (क्राईमबिट)
काठमाडौं । गृह मन्त्रालयले छिमेकी मुलुक भारतमा कोरोना सङ्क्रमणको दर उच्च गतिमा बढ्दै गएपछि सीमा नाकामा सुरक्षा सतर्कतामा कडाइ गर्न निर्देशन दिएको छ ।
गृह मन्त्रालयका प्रवक्ता चक्रबहादुर बुढाले भारतमा कोरोना सङ्क्रमणको दर बढेसँगै सीमा नाकामा उच्च स्वास्थ्य सतर्कता अपनाउन मातहतका संयन्त्रलाई निर्देशन गरिएको जानकारी दिए ।
मन्त्रालयले ७७ वटै जिल्लाका जिल्ला प्रशासन कार्यालय र सुरक्षा निकायलाई यस्तो निर्देशन दिएको हो ।
गृह प्रवक्ता बुढाका अनुसार सीमा नाका भएर आउनेको अनिवार्य रूपमा अभिलेख राख्न, अनिवार्य स्वास्थ्य जाँच गर्न र सीमा नाका हुँदै आएकाहरूमा स्वास्थ्य जाँचका क्रममा ज्वरो आएको पाइए क्वारेनटाइनमा राख्न निर्देशन दिएको छ ।
यसै गरी आम सर्वसाधारण नागरिकमा अनिवार्य मास्कको प्रयोग गर्न र स्यानिटाइजर लगायतका स्वास्थ्य सुरक्षा सामग्रीको प्रयोग गर्न पनि गृहले आग्रह गरेको छ । मास्क नलाउनेलाई कारबाहीको दायरामा ल्याउनसमेत गृहले प्रहरीलाई सर्कुलर गरेको छ ।
मन्त्रालयका अनुसार मास्क नलगाई हिँडेको पाइए सङ्क्रामक रोग ऐन २०२० अनुसार कारबाही गर्न प्रहरीलाई निर्देशन गरिएको हो ।
मन्त्रालयले छिमेकी मुलुकमा कोरोना सङ्क्रमणको दर बढ्दै गएपछि अन्य आवश्यक पर्ने विषयमा स्वास्थ्य मन्त्रालयसँग समन्वय गरेर अघि बढ्ने नीति लिएको छ । यस्तै डिजिटल सञ्चारका साधनहरूबाट सुरक्षा सावधानीका उपायहरूबारे सचेतना सन्देश प्रसारण गर्ने नीति पनि गृह मन्त्रालयले लिएको छ ।रासस
