ABC SANChAR
दाङ । शिक्षित बर्गहरुले नै औषधी नखाँदा दाङमा हात्तिपाईले रोग बिरुद्धको अभियान प्रभावित भएको देखिएको छ । फलस्वरुप दाङमा ११ औँ चरणमा यही चैत्र २० गते देखी हात्तीपाईले रोग विरुद्धको औषधी सेवन कार्यक्रम सुरु हुन लागेको छ ।
घोराही उपमहानगरपालिका स्वास्थ्य शाखाले बुधबार पत्रकारहरु सँग छलफलको आयोजना गरि जाने बुझेकाहरुले नै औषधी नखाँदा अभियान प्रभावित भएको बताएको छ । स्वास्थ्य शाखा प्रमुख नारायणप्रसाद घर्तीले सबै नागरिकहरुले औषधी नखाँदा अभियान लम्बिरहेको बताएका छन ।
केही महिना पहिले स्वास्थ्य कार्यालयले घोराहीका नारायणपुर, बाहुनडाँडा र रामपुरमा साढे ९ सय जनामा परिक्षण गर्दा ३५ जनामा हात्तिपाईलेको संक्रमण देखिएको थियो । उपमहानगरले २० गते विभिन्न केन्द्रहरुबाट र २१ देखी २६ गते सम्म घरभेट मार्फत औषधी खुवाउने कार्यतालिका बनाएको छ ।
एक लाख ८५ हजार ६ सय ९० जनालाई औषधी खुवाउने लक्ष्य लिएको प्रमुख घर्तीले जानकारी दिनुभयो । जस्का लागि एक सय २५ जना स्वास्थ्यकर्मी र २ सय ३४ जना महिला स्वास्थ्य स्वंसेविकाहरु खटिने भएका छन् ।
गत बर्ष ५८ प्रतिशत नागरिकहरुले मात्रै औषधी खाएको स्वास्थ्य शाखाले जनाएको छ । कार्यक्रममा नगर प्रमुख नरुलाल चौधरीले सबै नागरिकहरुलाई औषधी खान अपिल गरेका छन । नागरिकलाई स्वस्थ र निरोगी बनाउन सरकारले औषधी खुवाउने अभियान ल्याएको उनको भनाई छ ।
कार्यक्रममा प्रेस काउन्सील नेपालका सदस्य शरद अधिकारी र नेपाल पत्रकार महासंघ दाङका अध्यक्ष सविन प्रियासनले नागरिकहरुलाई औषधी सेवन अभियानमा सहभागि गराउन सञ्चार क्षेत्रले सदैब सहयोग गर्ने बताएका छन । स्वास्थ्य शाखाका ठाकुर खनालले लामखुट्टेको टोकाईबाट हात्तिपाईले रोगको संक्रमण फैलिने भएकाले सचेत र सजग रहने उपायको अबलम्बन गर्न आग्रह गरेका छन ।
