(सागर थापा)
बर्दिया । भारतबाट भन्सार छली गरि ल्याएको सामानसहित २ जना महिलालाई पक्राउ गरेको छ। पक्राउ पर्नेमा बाँसगढी नगरपालिका वडा नं. ६ बस्ने शारदा थारु र दिपा थारु रहेको जिल्ला प्रहरी कार्यालय बर्दियाका प्रहरी प्रमुख एसपी ईश्वर कार्कीले जानकारी दिनुभयो ।
उनीहरुसँग आएकी एक महिला भने सामान छाडेर भागेकी छन् । उनीहरुले साइकलमा किराना, सुर्तिजन्य तथा बिद्युतीय सामाग्रीहरु भारतबाट भन्सार छली गरि ल्याउदै गरेको समयमा प्रहरी चौकी कालिकाबाट खटिएको गस्ती टोलीले बढैयाताल गाउँपालिका वडा नं.७ पुरानो कण्ठपुरबाट पक्राउ गरेको हो । सामान करिब ८१ हजार ४८० रुपैयाँ पर्ने अनुमान गरिएको छ ।
यस्तै ईलाका प्रहरी कार्यालय सानोश्री बर्दियाको प्रहरी टोलीले पनि बर्दियाको मधुबन नगरपालिका वडा नं. ५ गाउँ स्थित खानेपानी भवनको कम्पाउण्डमा भारतबाट भन्सार छली गरी ल्याई बेवारिसे अबस्थामा राखिएका अन्दाजी मुल्य १८ हजार १४५ मुल्य बराबरको चिनि तथा किराना सामान बरामद गरेको छ । उक्त बरामद सामान र पक्राउ परेका महिलालाई आवश्यक कारबाहीको लागी राजापुर भन्सार कार्यालय गुलरियामा बुझाईएको एसपी कार्कीले बताउनुभयो ।
