ABC (क्राईमबिट)
सर्लाही । सशस्त्र प्रहरीले सोमवार साँझ सरकारी नम्बर प्लेटको मोटरसाइकलमा लागूऔषध लिएर भारत तर्फबाट नेपाल आउँदै गर्दा एक जना कार्यालय सहयोगीलाई पक्राउ गरेको छ ।
पक्राउ पर्ने धनकौल गाउँपालिका वडा नं. ३ का २६ वर्षीय जयकिशोर सिंह रहेको सशस्त्र प्रहरी उपरीक्षक गंगाराम श्रेष्ठले जानकारी दिएका छन् । ना.१ ब २२१२ नम्बरको सरकारी मोटरसाइकलमा भारतबाट नेपालतर्फ ल्याउँदै गरेको लागू औषध कोडिवेल कफ सिरफ सहित सिंहलाई पक्राउ गरिएको श्रेष्ठले जानकारी दिएका छन् ।
सशस्त्र प्रहरीको सुरक्षा बेस क्याम्प मनुस्माराले सिंहलाई ३ सय ७१ बोतल कोडिवेल सहित पक्राउ गरेको श्रेष्ठले बताएका छन् ।
सिंह धनकौल गाउँपालिकाका कार्यालय सहयोगी हुन् । मनुस्मारास्थित चेक प्वाईन्टमा रोकेर चेकजाँच गर्न खोज्दा फरार भएका सिंहलाई शसस्त्र प्रहरी निरीक्षकको कमाण्डमा रहेको टोलीले बरहथवा नगरपालिका–८, टाँडीबाट पक्राउ गर्न सफल भएको हो ।
भारतबाट तस्करले प्रहरीलाई छलेर लागूऔषध सिंहलाई दिएको थियो । सीमाबाट प्रहरीलाई छल्दै बरहथवा तर्फ आउँदै गर्दा शंका लागेर चेकजाँच गर्दा उनको साथबाट लागूऔषध बरामद भएको सशस्त्र प्रहरी उपरीक्षक श्रेष्ठले जानकारी दिएका छन् । थप अनुसन्धानका लागि सिंहलाई नेपाल प्रहरीको जिम्मा लगाइएको श्रेष्ठले बताएका छन् ।
