(ABC-Sanchar)
काठमाडौँ । काठमाडौं उपत्यकामा दैनिक सात सय टन फोहर निस्किन्छ । तर फोहर सङ्कलन नभएको दुई साता भयो । फोहोरको उचित व्यवस्थापनमा महानगरको कमजोरीले एकातिर सडकमा फोहरको थुप्रो देखिन थालेको छ भने अर्कातिर रोग फैलिने जोखिम बढेको छ ।
काठमाडौँ उपत्यकाबाट निस्कने फोहर दैनिक डेढ सयभन्दा बढी ट्रकले नुवाकोटको सिसडोल ल्यान्ड फिल्ड साइटमा लग्ने गरेको थियो । तर २ सातायता ती ट्रक गुडेका छैनन् । पानीले सडक हिलाम्मे भई ट्रक लान सक्ने अवस्था नरहेको कारण जनाएर महानगरपालिकाले फोहर सङ्कलन नै बन्द गरेको हो । जसका कारण उपत्यकाका टोल टोलमा फोहरको थुप्रो देखिन थालेको छ । घरमा दुर्गन्ध फैलिएको भन्दै सडकमा थुपार्ने क्रम बढेको हो । 
महानगरले भने अझै १५ दिन फोहर सङ्कलन नगर्ने बताएको छ । उसले सिसडोल ल्याण्डफिल साइट भरिसकेको र त्यसको विकल्पमा नुवाकोटको बञ्चरेडाँडामा ल्याण्डफिल साइट निर्माणको काम अन्तिममा पुगेको उसको भनाइ छ । फोहर सङ्कलनमा समस्या भएको अहिले मात्र होइन ।
महानगरले समय समयमा विभिन्न बहाना बाजी गर्दै आएको छ । उसँग फोहर व्यवस्थापनको दीर्घकालीन नीति नै छैन । कतिपयले कुहिने र नकुहिने छुट्टाएर फोहरलाई मोहरमा परिणत गरिरहेका छन् । तर यतातर्फ महानगरको चासो नै छैन ।
महानगरले दुई सातादेखी फोहर सङ्कलन नगर्दा टोल टोलमा दुर्गन्ध बढेको छ । त्यति मात्र होइन, हैजा, झाडापखाला, दम, श्वासप्रश्वास र छालासम्बन्धी रोगको जोखिम बढेको चिकित्सकहरुको भनाइ छ ।
फोहर व्यवस्थापन लागि बञ्चरेडाँडामा ल्याण्डफिल साइटको निर्माण गर्न थालेको तीन वर्ष भइसकेको छ । दुई वर्षमा सक्ने भनिएको थियो । तर ढिलासुस्तीमा कसैलाई जिम्मेवार बनाइएको छैन
