ABC ( Sanchar) बिरामीको मृत्यु भएपछि आक्रोशित स्थानीयवासीले अस्पतालमा तोडफोड गरेका छन् । अत्तरियास्थित पद्मा अस्पतालमा भर्ना भएका बिरामीको मृत्यु भएपछि आक्रोशित स्थानीयले अस्पतालमा तोडफोड गरेका हुन् ।
हिजो साँझ स्वास्थ्यमा समस्या देखिएपछि भर्ना गरिएका गोदावरी नगरपालिका–३ का ३८ वर्षीय विनोद बोहराको उपचारका क्रममा आज मृत्यु भएको थियो । आक्रोशित स्थानीयले ढुङ्गामुढा गरेपछि अस्पताल भवनको सिसा फुटेको, एम्बुलेन्स र भ्यानमासमेत क्षति पुगेको जिल्ला प्रहरी कार्यालयका प्रवक्ता एवं प्रहरी नायब उपरीक्षक वेदप्रकाश जोशीले बताए ।
चिकित्सकको लापरबाहीका कारण बिरामीको मृत्यु भएको भन्दै स्थानीयले अत्तरिया चोकमा टायर बालेर प्रदर्शन जारी राख्दा यातायात सेवा पनि ठप्प बनेको छ । अस्पतालमा थप क्षति हुन नदिन ठूलो संख्यामा सुरक्षाकर्मी परिचालन गरिएको डिएसपी जोशीले बताए । उनका अनुसार पीडित पक्ष र अस्पताल प्रशासनबीच वार्ताको प्रयास भइरहेको छ । रासस
