ABC (क्राईमबिट)
काठमाडौं । गृहमन्त्रालय अन्तर्गतको बढुवा समितिले नेपाल प्रहरीको उच्च पदमा बढुवाको गृहकार्य थालेको छ । यहि बैशाख ३० मा हुने स्थानीय तह सदस्य निर्वाचनलगत्तै रिक्त प्रहरी अतिरिक्त महानिरीक्षक (एआईजी) मा बढुवाको लागि सिफारिस गर्ने तयारी थालिएको छ ।
नेपाल प्रहरीमा हाल चार एआईजीको दरबन्दी रिक्त छ । यसअगाडीका प्रहरी महानिरीक्षक (आईजीपी) शैलेश थापा क्षेत्रीसंगै प्रहरी अतिरिक्त महानिरीक्षक (एआईजी)हरु हरीबहादुर पाल, निरजबहादुर शाही, प्रध्युम्नकुमार कार्की र बसन्तकुमार पन्तले बैशाख १८ गतेदेखि ३० बर्षे सेवाहदको कारण अनिवार्य अवकास पाएका थिए ।
उनिहरुमध्ये गतसाता प्रहरी नायब महानिरीक्षक (डीआईजी) बसन्तकुमार लामालाई एआईजीमा एकल बढुवा सिफारिस गरिएको छ । बढुवा सिफारिसमा परेका लामाले एआईजीको ५६ बर्षे उमेरहदका कारण जेठ ७ देखि अनिवार्य अवकाश पाँउदैछन् । लामाको अवकाशपश्चात् नेपाल प्रहरीमा पाँच एआईजीको दरबन्दी रिक्त हुनेछ ।
गृहमन्त्रालयसम्बद्ध उच्च स्रोतका अनुसार स्थानिय निकायको निर्वाचनलगत्तै जेठ पहिलो साता नेपाल प्रहरीका पाँच डीआईजीलाई एआईजीमा बढुवा सिफारिस गर्ने तयारी गरिएको छ ।
रिक्त पाँच एआईजी पदमा डीआईजीहरु उत्तमराज सुवेदी, अरुणकुमार बिसि, दिवेश लोहनी, मुकुन्दराज आचार्य र पुजा सिंहलाई बढुवा सिफारिस गर्ने तयारी छ । डीआईजीद्वय सुवेदी र बिसि २०७७ बैशाख ७ मा अनि डीआईजीद्वय लोहनी र आचार्य २०७७ पुस २० मा डीआईजीमा बढुवा भएका थिए ।
हालका आईजीपी धिरजप्रताप सिंहसंगै २०४९ चैत ११ मा प्रहरी निरिक्षकबाट नेपाल प्रहरीमा सेवा प्रवेश गरेका उनिहरुमध्ये सुवेदी, बिसि र लोहनी काबिल प्रहरी अधिकृतको रुपमा परिचित छन् ।
हाल डीआईजी सुवेदी उपत्यका प्रहरी कार्यालय रानीपोखरीको निमित्त प्रमुख, बिसि एक नम्बर प्रदेश प्रहरी प्रमुख, लोहनी गण्डकी प्रदेश प्रहरी प्रमुख, आचार्य राष्ट्रिय प्रहरी प्रशिक्षण प्रतिष्ठान महाराजगन्जको निमित्त कार्यकारी निर्देशक र सिंह बागमती प्रदेश प्रमुखको जिम्मेवारीमा कार्यरत छन् ।
