(सागर थापा)
दाङ । सरकारी वकिल कार्यालय दाङको दुई तला माथिबाट हाम फालेर भागेका थुनुवालाई जिल्ला प्रहरी कार्यालय दाङले २४ घण्टा नबित्दै पक्राउ गरेको छ ।
प्रहरीले म्याद थप्न लगेको बेला शौचालयको झ्यालबाट भागेका थुनुवा लक्ष्मण विश्वकर्मालाई प्रहरीले पुन: पक्राउ गरेको जिल्ला प्रहरी कार्यालय दाङका प्रहरी प्रमुख एसपि बिर बहादुर वलिले जानकारी दिनुभएको छ ।
विश्वकर्मा बिहिबार अपरान्ह म्याद थपका लागि लगेका बेला सरकारी वकिल कार्यालयको दुई तला माथिको शौचालयको झ्यालबाट हाम फालेर भागेका थिए ।
घोराही उपमहानगरपालिका वडा नम्बर १७ का २२ वर्षीय विश्वकर्मा सुन र पैसा चोरीको अभियोगमा पक्राउ परेका हुन ।
म्याद थप नहुँदै थुनुवा भागेका अभियुक्त विश्वकर्मालाई जिल्ला प्रहरी कार्यालय दाङबाट खटिएको विशेष प्रहरी टोलीले शुक्रबार राति घोराही चौघेरामा लुकिछिपी बसेको अवस्थामा पक्राउ गरेको दाङ एसपि वलिले बताए ।
