(ABC-Sanchar)
दाङ । लुम्बिनी प्रदेश सभामा नेकपा एमाले ठूलो दल बनेको छ । सरकार बनाउने गरी कुनै पनि दलको एकल बहुमत नआए पनि प्रत्यक्षतर्फ प्रदेश सभाका ५२ मध्ये १८ सिट जितेर एमाले पहिलो दल बनेको हो । कांग्रेस १७ सिटसहित दोस्रो र माओवादी ५ सिटसहित तेस्रो छ ।
जनता समाजवादी र स्वतन्त्रले ३/३ सिट जितेका छन् । नागरिक उन्मुक्ति पार्टी, राष्ट्रिय प्रजातन्त्र पार्टीले २/२ सिट जित्दा सिके राउत नेतृत्वको जनमत पार्टी र लोकतान्त्रिक समाजवादीले १/१ सिट जितेका छन् ।
अहिलेको सत्ता गठबन्धनको एक घटक राष्ट्रिय जनमोर्चाले प्रदेश सभामा कुनै पनि सिट हासिल गर्न सकेन । राप्रपा, नागरिक उन्मुक्ति, जनमत र लोसपा नयाँ दलका रूपमा प्रदेश सभामा आएका छन् । कुनै पनि दलको स्पष्ट बहुमत नआउने भएपछि प्रदेश सरकार गठनमा अन्योल र चर्चा बढेको छ । पुरानै गठबन्धनले पनि बहुमत पुर्याउन नसके कसरी सरकार गठन गर्ने भन्ने विषयमा दलहरूले अनौपचारिक छलफल सुरु गरेका छन् । एमालेले जसपाको साथमा राप्रपा र स्वतन्त्रलाई ल्याएर सरकार बनाउने प्रयास गर्नेछ । त्यो गर्दा २६ सिट हुनेछ । पुरानै गठबन्धन कायम रहेको अवस्थामा कांग्रेस नेतृत्वमा सरकार बन्नेछ । त्यसो गर्दा पनि कांग्रेसको १७, माओवादीको ५ र जनमत र नागरिक उन्मुक्ति र लोसपासमेत गर्दा २६ सिट हुन्छ । नागरिक उन्मुक्ति पार्टी कांग्रेससँग गठबन्धन गरेर सरकारमा सहभागी हुने विषयमा सकारात्मक भएको एक कांग्रेस नेताले बताए । उनका अनुसार कांग्रेसले सकेसम्म पहिलो चरणमै आफ्नो नेतृत्वमा एमालेबाहेकका सबै दललाई मिलाएर सरकार गठनको प्रयास गर्नेछ । ‘त्यो सम्भव नभए सरकारको नेतृत्व अर्को पार्टीको पनि हुन सक्छ,’ उनले भने, ‘तर, अहिले कांग्रेसकै नेतृत्वमा सरकार बनाउने गरी अनौपचारिक छलफल जारी छ ।’
