बाँके । नेपालगन्ज भारतसँगको खुला सीमाबाट हुने चोरी तस्करी नियन्त्रणका लागि सशस्त्र प्रहरी बल, नेपाल नं. ३० गण हे.क्वा. बागेश्वरी बाँकेले सीमा क्षेत्रमा कडाइ गरेको छ।
गणले पछिल्लो एक महिनाको अवधिमा जिल्लाका विभिन्न नाकाहरूबाट भन्सार छली ल्याइएका करोडौं मूल्य बराबरका अवैध सामग्रीहरू बरामद गरेको छ।
सशस्त्र प्रहरीका अनुसार नरैनापुर, डुडुवा, जानकी र नेपालगञ्ज उप-महानगरपालिकाका सीमावर्ती क्षेत्रहरूमा गरिएको नियमित गस्ती तथा विशेष अप्रेसनका क्रममा उक्त सामग्री बरामद गरिएको हो।
बरामद सामग्रीमा भन्सार छलीका कपडा, किराना सामान, इलेक्ट्रोनिक सामान, मोटर पार्ट्स, सुर्तीजन्य पदार्थ तथा भारतबाट अवैध रूपमा ल्याइएका खाद्यान्नलगायत रहेका छन्।
बरामद गरिएका सम्पूर्ण सामग्री आवश्यक कारवाहीका लागि नेपालगञ्ज भन्सार कार्यालयमा बुझाइएको सशस्त्र प्रहरी बल बाँके ३० गणका गणपति, सशस्त्र प्रहरी उपरीक्षक एसपी भिम चन्दले जानकारी दिनुभयो।
एसपी चन्दका अनुसार सीमा क्षेत्रमा हुने अवैध गतिविधि नियन्त्रण गर्न सशस्त्र प्रहरी बलको गस्ती र चेकजाँचलाई थप कडा पारिएको छ।
सीमा अपराध र चोरी तस्करी नियन्त्रण हाम्रो प्राथमिकता हो। अवैध सामग्री ओसारपसारमा संलग्न जो कोहीलाई पनि कानुनी दायरामा ल्याइने छ,” गणपति एसपी चन्दले बताउनुभयो।
