(सागर थापा)
दाङ । जिल्लामा अघिल्लो आर्थिक वर्षको तुलनामा यस आर्थिक वर्ष सवारी दुर्घटनाको संख्या घटेको छ ।
चालु आर्थिक वर्ष २०७९/०८० को ५ महिनामा अघिल्लो वर्ष भन्दा यो वर्ष दुर्घटना दाङ जिल्लामा घटेको छ । जसमा ५ महिनामा जम्मा २० जनाको मृत्यु भएको दाङ जिल्ला ट्राफिक प्रहरी प्रमुख झबिन्द्र परियारले जानकारी दिनु भयो ।त्यस्तै उहाँका अनुसार अघिल्लो आर्थिक वर्ष २०७८/०७९ मा सवारी दुर्घटनाबाट ८९ जनाले ज्यान गुमाएका थिए । अघिल्लो र यस आर्थिक वर्षको ५ महिना भित्रको रेकर्ड हेर्दा सवारी दुर्घटनामा ज्यान गुमाउँनेको संख्या न्यूनीकरण भएको हो ।
जिल्ला ट्राफिक प्रहरी कार्यालय दाङका ट्राफिक प्रमुख प्रहरी निरीक्षक झबिन्द्र परियार आइसकेपछि पहिलो कार्य विद्यालयका शिक्षक र विद्यार्थीसंग सवारी दुर्घटना कसरी हुन्छ ? सवारी दुर्घटना कसरी न्यूनीकरण गर्न सकिन्छ भन्ने विषयमा जनचेतनामूलक सन्देश सहित प्रशिक्षण कार्यक्रम चलाउनु भएको थियो ।
यस्तै बसपार्कहरुमा सवारी दुर्घटना हुनुको कारण तथा दुर्घटनालाई न्यूनीकरण गर्ने उपाय सम्बन्धि र ब्यानर तथा डाक्टर सहित सवारी चालकका आँखा चेकजाँच र प्रशिक्षण प्रदान गर्ने कार्यलाई प्रमुख परियारले पहिलो प्राथमिकताका साथ आफ्नो कार्यहरु अघि बढाउनु भएको थियो ।
