मेगमन बुढा
दाङ । देउखुरीको राजपुर गाउँपालिका वडा नम्बर ७ सुनपथरी नाकामा ३० दिने आधारभूत बुटिक तालिमको बुधबार एक कार्यक्रमको बीचमा उद्घाटन भएको छ ।
राजपुर गाउँपालिका वडा नम्बर ७ का वडा अध्यक्ष पुष्कर ओलीको अध्यक्षता तथा राजपुर गाउँपालिका अध्यक्ष शरद कुमार बुढाथोकीको प्रमुख आतिथ्यता र उपाध्यक्ष धनपतिदेवी यादवको विशेष अतिथिमा उक्त बुटिक तालिम उद्घाटन भएको हो ।
त्यस्तै सो तालिमलाई उद्घाटन गर्दै गाउँपालिका अध्यक्ष बुढाथोकीले नाका क्षेत्रलाई गाउँपालिकाबाट विशेष प्राथमिकता दिएर विभिन्न सीपमूलक तालिमहरु प्रदान गर्न खोजेको बताउनु भयो । नाका क्षेत्रका महिला दिदीबहिनीलाई जसरी भएपनि विभिन्न सीपमूलक तालिमहरु सिकालाई एक उद्यमी बनाउने राजपुर गाउँपालिकाले प्रमुख योजना समेत राखेको कार्यक्रममा अध्यक्ष बुढाथोकीले बताउनु भयो ।
त्यसैगरी उक्त तालिममा सहभागी सबै प्रशिक्षार्थीलाई गाउँपालिका अध्यक्ष बुढाथोकीले ३० दिनको बसाईमा प्रशिक्षकद्वारा सिकाइएका बुटिक सम्बन्धि सम्पूर्ण सीपहरुलाई ध्यानपूर्वक सिक्न आग्रह गर्दै उहाँले अब कुनैपनि महिला दिदीबहिनीले चिन्ता लिनु नपर्ने र योसंगै आगामी दिनमा अझै थप तालिमको व्यवस्थापन राजपुर गाउँपालिकाले गर्ने बताउनु भयो ।
कार्यक्रममा उपाध्यक्ष यादवले नाका क्षेत्रका महिला दिदीबहिनीहरु जसरी भएपनि उद्यमी बन्नु पर्ने धारणा राख्नु भयो । अबदेखि सम्पूर्ण महिला दिदीबहिनीले सीप सिकेर आफैले आयआर्जनगरि आफ्नो बालबच्चालाई पढाउने र घर खर्च चलाउन सक्ने स्थिति बनाउनु पर्नेमा जोड दिनुपर्ने बताउनु भयो ।
त्यस्तै वडा अध्यक्ष ओलीले आगामी दिनमा यसैगरी निरन्तर आफ्नो वडा भित्रमा गाउँपालिका तथा अन्य विभिन्न संघ संस्थासंग समन्वय गरेर सीपमूलक तालिमहरुको व्यवस्थापन गरेर सम्पूर्ण वडा बासिलाई आत्मनिर्भर बनाउने कार्य तिर आफू सधै लागि पर्ने बताउनु भयो ।
महिला तथा बालबालिका शाखा राजपुरका प्रमुख सुनिता चौधरीको स्वागत मन्तव्यबाट संचालन भएको कार्यक्रममा प्रमुख चौधरीले उक्त तालिम कार्यक्रमको बारेमा जानकारी गराउनु भएको सो उद्घाटन तालिम कार्यक्रमको संचालन महिला तथा बालबालिका शाखा राजपुरका सामाजिक परिचालक कमला पुलामीले गर्नु भएको थियो ।
फाल्गुन १७ गतेदेखि चैत १६ गतेसम्म संचालन रहने उक्त तालिममा १३ जना महिलाहरु सहभागी रहनु भएको छ भने प्रशिक्षकमा सो तालिम सम्बन्धि बिज्ञय रामकुमारी चौधरी रहनु भएको छ ।
