(ABC-Sanchar)
काठमाडौं । नेकपा एकीकृत समाजवादीका अध्यक्ष माधवकुमार नेपालले आफू चुनौतीको सामना गर्न तयार रहेको बताएका छन् । युरोपबाट फर्किएपछि विमानस्थलमा पत्रकारहरूसँग कुरा गर्दै पूर्वप्रधानमन्त्री समेत रहेका अध्यक्ष नेपालले आफू नभागेको प्रष्टीकरण दिँदै चुनौतीको सामना गर्न तयार रहेको बताएका हुन् ।
सर्वोच्च अदालतले ललिता निवासको छानबिन अघि बढाउन आदेश दिएको भोलिपल्टै नेपाल पूर्वनिर्धारित कार्यक्रममा स्वीजरल्याण्ड गएका थिए । आफु विदेश गएपछि माधव नेपाल भाग्यो भनेर हल्ला फैलाइएको भन्दै उनले आफू जस्तोसुकै चुनौतीको सामना गर्ने नेचर बोकेको मान्छे भएकाले फेस गर्न तयार रहेको बताएका हुन् ।
‘सर्वोच्चबाट अघिल्लो दिन बेलुका ललिता निवास छानबिन अघि बढाउनु भनेर भनियो । म प्रधानमन्त्री भएको बेला जग्गासम्बन्धी कतिपय निर्णय भएको थियो । कतिले माधव नेपाल भाग्यो, लुकेर बसेका छन् । फर्किने हिम्मत छैन भनेर लेखे,’ उनले भने, ‘माधव नेपाल भाग्ने खालको मान्छे हैन भन्ने बुझ्नुपर्थ्यो, बुझेनन् । राजाले गिरफ्तार गर्न खोज्दा त भाग्ने मान्छे हैन । कुनै गल्ती अपराध बदामासी नगरेको, भ्रष्टाचार नगरेको सन्दर्भमा पूर्वनिर्धारित कार्यक्रममा जाने अवस्था बन्यो म गएँ ।’
सबै कार्यक्रममा भाग लिएर फर्किउँला भन्ने भएकोमा अनावश्यक टिकाटिप्पणी हुन थालेपछि कार्यक्रम छोट्याएर फर्किएको उनले बताए । साथै उनले ललिता निवास प्रकरणको छानविन गर्ने सन्दर्भमा आफु नआत्तिएको समेत बताए ।
‘मैले बिराएको छैन । कुनै बदमासी अपराध गरेको छैन । भ्रष्टाचार लेनदेन गरेको छैन । यो सबै स्थितिको कारणले म आत्तिएको छैन । तर, अलिकति चित्त दुखेको छ । चित्त किन दुखेको छ भने, देशको निम्ति केही गरौँला भन्यो, के पो भयो,’ उनले भने ।
