(ABC-Sanchar)
पाल्पा । गुल्मी सडकअन्तर्गत रिब्दीकोट गाउँपालिका–२, देउरालीको लघुवा र जोर्तेको बीच भागमा सुख्खा पहिरोले जिप पुरिँदा मृत्यु भएका तीनै जनाको पहिचान खुलेको छ ।
बुधबार बिहान भएको दुर्घटनामा गुल्मीको रेसुङ्गा नगरपालिका–७, की ५० वर्षीया मनकला चुँदारा, गुल्मी प्रहरीमा कार्यरत प्रहरी सहायक हवल्दार तानसेन नगरपालिका–११, बन्दीपोखराका ४२ वर्षीय यमबहादुर बोहोरा र पोखरा महानगरपालिका–२५, हेम्जाका ३१ वर्षीय विनोद तिम्सिनाको मृत्यु भएको जिल्ला प्रहरी कार्यालयका सूचना अधिकारी तथा प्रहरी नायब उपरीक्षक वीरेन्द्र थापाले जानकारी दिए । तीनै जनाको घटनास्थलमै माथिल्लो भागबाट खसेको सुख्खा पहिरोले जिप पुरिँदा मृत्यु भएको हो ।
गुल्मीको तम्घासबाट पाल्पा भई बुटवल जाँदै गरेको लु १ ज ४६०० नम्बरको रुरु रेसुङ्गा यातायात प्रा.लि.को जिप सडक स्तरोन्नति गरेको जोर्ते क्षेत्रमा सुख्खा पहिरोले च्यापिएको प्रहरीले जनाएको छ । घाइते ८ जनामध्ये चालक बालकृष्ण श्रेष्ठ सकुशल रहेका छन् ।
बाँकी सात जनाको तानसेन पाल्पास्थित लुम्बिनी मेडिकल कलेजमा उपचार भइरहेको छ । दुर्घटनामा एकै गाउँका सात जना घाइते भएका छन् । जिल्ला प्रहरी कार्यालयका सूचना अधिकारी थापाका अनुसार दुर्घटनामा गुल्मीको रेसुङ्गा नगरपालिका-८ खानीगाउँका ४० वर्षीया शोभा घर्ती मगर, सोही स्थानकी ३७ वर्षीया शुस्मा राना, शुस्मा रानाकी छोरी ६ वर्षीया सुरवी राना, उनकै ५ महिनाकी छोरी सुविया राना, ४५ वर्षीय टेकबहादुर जीएम, २७ वर्षीया स्वीकृति थापा र उनका ५ वर्षीय छोरा सुरेन थापा घाइते भएका हुन् । घाइते सबैको तानसेनस्थित लुम्बिनी मेडिकल कलेजमा उपचार भइरहेको छ ।घटनाको थप अनुसन्धान भइरहेको प्रहरीले जनाएको छ ।
