(ABC-Sanchar)
पर्सा । बिरगंज शनिवार बिदाको दिन इजाजत नलिएर चलाइएको जिल्ला प्रशासन कार्यालय पर्साका प्रमुख जिल्ला अधिकारीसमेतको गाडीलाई राष्ट्रिय युवा सङ्घ नेपाल पर्सा जिल्ला कमिटीले नियन्त्रणमा लिएको हो ।
जिल्ला ट्राफिक प्रहरी कार्यालय पर्साको सहयोगमा शनिवार बिदाको दिन चेकजाँचमा कडाइ गरी सरकारी सवारी साधन नियन्त्रणमा लिइएको राष्ट्रिय युवा सङ्घ पर्साका अध्यक्ष मोहम्मद निजामले जानकारी दिए । उनकाअनुसार प्रमुख जिल्ला अधिकारीको गाडीसहित ३ वटा गाडी र ४० वटा मोटरसाइकल नियन्त्रणमा लिएर जिल्ला ट्राफिक प्रहरीको जिम्मा लगाइएको छ ।
वीरगञ्जको घण्टाघरबाट नियन्त्रणमा लिइएका सवारी साधन बेलुका ५ बजेपछि मात्रै छोडिने युवा सङ्घ वीरगञ्ज महानगरका अध्यक्ष अमिर खानले बताए । प्रमुख जिल्ला अधिकारीको गाडी भने पास लिएर आउने सर्तमा फिर्ता पठाइएको उनको भनाई छ ।
बिदाको दिन पनि सरकारी सवारी साधन दुरुपयोग हुने गरेको पाइएपछि युवाहरूले खबरदारी स्वरूप सवारी साधन नियन्त्रणमा लिने अभियानको थालनी गरिएको राष्ट्रिय युवा सङ्घ पर्साका अध्यक्ष निजामले बताए ।
सो अवसरमा सङ्घका केन्द्रीय सदस्यहरू रबी गुप्ता, बाबुराम खनाल, कौशल किशोर साह, प्रदेश सदस्य रोशन साह, महानगर अध्यक्ष अमिर खान, जिल्ला कमिटी सचिव अर्जुन नेपाल, सदस्यहरू साहिर अन्सारी, प्रमोद पटेल लगायतको उपस्थिति रहेको थियो ।
