(ABC-Sanchar)
काठमाडौं । शिक्षा विधेयकप्रति असन्तुष्टि जनाउँदै नेपाल शिक्षक महासङ्घ आन्दोलित भएको छ ।
महासङ्घले सदनमा दर्ता भएको शिक्षासम्बन्धी विधेयकप्रति शिक्षकहरूको हकहित विपरीत भएको भन्दै आन्दोलनको घोषणा गरेको हो ।
महासङ्घका अध्यक्ष कमला तुलाधरले बारम्बार सरकारसँग माग गरेको र वार्तामा भएको मागहरू सम्बोधन नभएकाले सडक आन्दोलन गर्न बाध्य भएको बताइन् । उनले पटक पटकको संवाद र छलफल पछि पनि सरकारले यो विधेयक मार्फत शिक्षक-कर्मचारीलाई धोका दिएको बताइन् ।
उनका अनुसार उक्त विधेयकले एकातिर स्थायी, अस्थायी करार, राहत, साबिक उच्च माध्यमिक विद्यालय, शिक्षण सिकाइ अनुदान, विशेष शिक्षा, प्राविधिक धार र संस्थागत विद्यालयका शिक्षक लगायत सबै प्रकारका शिक्षक तथा विद्यालय कर्मचारीका मूलभूत मुद्दाहरूलाई सम्बोधन गर्न सकेको छैन ।
महासङ्घले आगामी असोज ३ गतेबाट देशभरिका विद्यालय बन्द गरी काठमाडौँ केन्द्रित आन्दोलन गर्ने जनाएको छ ।
