(ABC-Sanchar)
काठमाडौं । दिल्ली अजय देवगन आफ्नो आगामी फिल्म सिंघम अगेनका कारण लगातार चर्चामा छन् । हालै फिल्मका केही पोस्टर सार्वजनिक गरिएको थियो । यी पोस्टरहरूलाई हेरेर फिल्मप्रति दर्शकहरूको उत्साह बढेको छ ।
अजय अचेल यही फिल्मको सुटिङमा व्यस्त छन् । फिल्मको एक्सन सिक्वेन्स सुटिङको बेलामा अजय घाइते भएको खबर आएको छ । निर्देशक रोहित शेट्टी र उनको टिमले हालै विले पार्लेमा फिल्मको सुटिङ गरेका थिए । त्यहाँ एक्सन सिनको सुट भइरहेको थियो । त्यही बेलामा अजयको आँखामा चोट लाग्यो । लडाइँको दृश्य सुटिङ भइरहेको बेलामा झुक्किएर अजयको अनुहारमा लाग्दा आँखामा चोट लागेको बताइएको छ ।
सुटिङबाट केही घण्टा ब्रेक लिएर अजयले चोटको उपचार गराए । यो बिचमा खलनायकको दृश्य सुट भयो । आँखाको चोटको उपचार गरेर अजयले केही घण्टापछि सुटिङ पुनः सुचारु गरे । अजय सकेसम्म आफ्नो काममा कुनै असर पर्न दिँदैनन् । सिंघम अगेनमा स्टार कास्टको भिड छ ।
फिल्ममा अजयबाहेक करिना कपुर र दीपिका पादुकोण पनि छिन् । यसबाहेक रणवीर सिंह र अक्षय कुमार पनि महत्त्वपूर्ण भूमिकामा छन् । फिल्ममा टाइगर श्रौफ पनि देखिनेछन् ।
