(ABC-Sanchar)
मकवानपुर । राक्सिराङ गाउँपालिका ७ दुगुवाङका बलबहादुर प्रजाको मृत्यु भएको हो । जंगली च्याउ खाएर गम्भीर बिरामी भएका उनको चितवनको भरतपुर सरकारी अस्पतालमा उपचारका क्रममा मृत्यु भएको हो ।
जंगली च्याउ खाँदा बलबहादुरसहित ५ जना बिरामी भएका थिए । बिरामी परेका उनीहरुलाई उपचारका लागि सिधै चितवन लगिएको थियो ।
बलबहादुरले जंगलबाट ल्याएको च्याउ पकाएर खाएकाहरु बिरामी परेका हुन् । बिरामी पर्नेमा बलबहादुरको ४५ वर्षीया श्रीमती जालीमाया प्रजा, १५ वर्षीया छोरी रेन्जु र ८ वर्षीया छोरी सविना तथा १० वर्षका छोरा सुशील बिरामी परेका छन् उनीहरुको चितवनमै उपचार भैरहेको छ ।
बिरामी चारैजनाको अवस्था सामान्य रहेको जिल्ला प्रहरी कार्यालय मकवानपुरका निमित्त प्रवक्ता प्रहरी निरीक्षक ओमप्रकाश पण्डितले जानकारी दिए । घटनापश्चात प्रहरी चौकी कान्द्राङ राक्सिराङको टोली घटनास्थलमा पुगेको थियो ।
यस विषयमा आवश्यक अनुसन्धान अघि बढाइएको प्रहरीले जनाएको छ ।
