बाँकेको शिखनपुरूवामा गोली चल्यो

   (महेन्द्र  सिंह )                                                            बाँके प्रहरीले  डाँका चोरी मुद्दामा फरार प्रतिवादीलाई पक्राउ गर्न गोली प्रहार गरेको छ। डडुवा–६ शिखनपुरूवाका  फरार प्रतिवादी सरमान सिंह सरदारलाई नियन्त्रणमा लिन गोली चलाएको जिल्ला प्रहरी कार्यालय बाँकेका प्रमुख  प्रहरी उपरीक्षक तुल बहादुर कार्कीले बताए । घटना बिहीबार बिहान साढे ८ बजेतिरको भएको बताइएको छ । उनलाई नियन्त्रणमा लिएर प्रहरी पुग्दा स्थानीयवासीले अवरोध पुर्‍याएपछि ३ राउण्ड गोली चलाइएको  प्रहरीको भनाइ छ । सो क्रममा एक स्थानीयको खुट्टामा गोली लागेको बताइएको छ । यस्तै   झडपमा  ईलाका प्रहरी कार्यालय हिरमिनियामा कार्यरत प्रहरी वरिष्ठ हवल्दार मदन डाँगीसहित केही जवानहरु घाइते भएका छन् ।  यस्तै फरार रहेका प्रतिवादी सरमान सिंह सरदारको पनि घुँडामा एक राउण्ड गोली लागेको प्रहरीले जनाएको छ ।