काठमाडौं । महानगर २२ अध्ययन समितिले २ मंसिरमा प्रतिवेदन बुझाउनेछ हाललाई तीनबुँदे सहमतिपछि विवाद टुंगिएको छ । अध्ययन समितिले मंसिरमा रिपोर्ट बुझाउनेछ । सोहीअनुसार अगाडि बढ्छौँ ।
यस्तो छ तीनबुँदे सहमति
– फुटपाथ निर्माण भइसकेको वडा नम्बर २४ को फुटपाथले पार्ने पैदलयात्रु र व्यवसायीमा पार्ने सामाजिक, सांस्कृतिक, आर्थिक प्रभावबारे अध्ययन गर्ने ।
– वडा नम्बर २२ र २३ मा निर्माणको चरणमा रहेको फुटपाथ विस्तारले पार्ने सम्भाव्य प्रभावबारे अध्ययन गर्ने ।
– महानगरअन्तर्गत सहरी योजना आयोगका उपाध्यक्ष डा. सुमननरसिंह राजभण्डारीको संयोजकत्वमा अध्ययन समिति बनाउने ।
न्युरोड फुटपाथ विस्तारका क्रममा उत्पन्न विवाद तीनबुँदे सहमतिपछि मिलेको छ । महानगरका मेयर बालेन्द्र साह (बालेन), उपमेयर सुनिता डंगोल र वडा नम्बर २२, २३ र २४ का जनप्रतिनिधिसहित भएको वार्ताले तीनबुँदे सहमति गरेपछि विवाद टुंगिएको हो ।
सहमतिअनुसार हाल फुटपाथ निर्माण भइसकेको वडा नम्बर २४ को फुटपाथले पार्ने पैदलयात्रु र व्यवसायीमा पार्ने सामाजिक, सांस्कृतिक, आर्थिक प्रभावबारे अध्ययन गर्ने, वडा नम्बर २२ र २३ मा फुटपाथ विस्तारले पार्ने प्रभावबारे अध्ययन गर्ने र महानगरअन्तर्गत सहरी योजना आयोगका उपाध्यक्ष डा. सुमननरसिंह राजभण्डारीको संयोजकत्वमा अध्ययन समिति बनाउने निर्णय भएको छ । वार्तामा सहभागी वडा नम्बर २३ का अध्यक्ष मचाराजा महर्जनका अनुसार अध्ययन समितिले २ मंसिरमा प्रतिवेदन बुझाउनेछ । ‘हाललाई तीनबुँदे सहमतिपछि विवाद टुंगिएको छ । अध्ययन समितिले मंसिरमा रिपोर्ट बुझाउनेछ । सोहीअनुसार अगाडि बढ्छौँ,’ महर्जनले भने ।
समितिको संयोजकमा आयोगका उपाध्यक्ष राजभण्डारी रहनेछन् । नौ सदस्यीय समितिमा २२, २३ र २४ वडाका अध्यक्ष, फुटपाथ विस्तारबारे जानकार २२ वडाका दुईजना, २३ र २४ वडाका एक–एकजना गरी चारजना र सार्वजनिक निर्माण विभाग प्रमुख सुरज शाक्य सदस्यसचिव रहनेछन् । महर्जनका अनुसार अध्ययन समितिले चार महिनापछि अध्ययन प्रतिवेदन बुझाउने र त्यसमा छलफलपछि मात्र फुटपाथ विस्तार हुने–नहुने निर्णय हुनेछ ।
सडकलाई पैदलयात्रीमैत्री बनाउन भन्दै महानगरपालिकाले बोलपत्रमार्फत निर्माण पक्ष छनोट गरेर गत ११ जेठदेखि काम थालेको थियो । तर, डिभिजन सडक कार्यालय, काठमाडौंले आफ्नो क्षेत्राधिकारको सडक भएकाले अनुमतिविना काम नगर्न १२ जेठमा सडक डिभिजन काठमाडौंले हस्तक्षेप गरेको थियो । यसपछि काम रोक्न १३ र १६ जेठमा गरी दुईवटा पत्र पठाएको थियो । महानगरले फुटपाथ विस्तारका लागि काटेको सडकलाई कार्यालयले २१ जेठमा मर्मतसमेत गरेको थियो । जसका कारण डिभिजन कार्यालयले पठाएको पत्र अनुचित भनेर २७ जेठमा महानगरपालिकाले उच्च अदालत पाटनमा रिट दायर गरेको थियो । उच्च अदालतले फुटपाथ विस्तारका लागि बाटो खोलिदिएपछि २ साउनदेखि फेरि फुटपाथ विस्तार सुरु भएको थियो । तर, फेरि फुटपाथ विस्तारको काम जनप्रतिनिधिको नेतृत्वमा स्थानीयले विरोध गर्दै रोकेका थिए । वडा नम्बर २२ का अध्यक्ष चिनिकाजी महर्जनले विरोधस्वरूप सोमबार सडकबाटै कार्यालयको सेवा दिएका थिए ।
