काठमाडौं । ३० वर्षे सेवा अवधि खारेज गर्नुपर्ने मागसहितको रिट दर्ता भएको सर्वोच्च अदालत प्रशासनले जनाएको छ ।
उपत्यका ट्राफिक प्रहरी कार्यालयका प्रहरी वरिष्ठ उपरीक्षक (एसएसपी) जीवन कुमार श्रेष्ठ समेतका वारेस कुमार बस्नेतले रिट दायर गरेका हुन् ।
नेपाल प्रहरीमा जनपद समूह तर्फ र सशस्त्र प्रहरीमा ठुलो संख्याका उच्च अधिकृतहरू अवकाशमा जाँदै छन् । २०५१ भदौ १६ मा प्रहरीमा प्रवेश गरेकाहरू भदौ १५ बाट अवकाशमा जान लागेका हुन् । सशस्त्र युद्धमा लडेका उनीहरू ३० वर्षे सेवा अवधि पुरा गरेर संगठनबाट बिदा हुन लागेका हुन् ।
अवकाश हुन लागेका अधिकांश अधिकृतहरू ५० वर्ष हाराहारीका छन् । कम उमेरमा अवकाशमा पठाउन लागिएको भन्दै उनीहरुले ३० वर्षे सेवा अवधि रिट दायर भएको मितिबाटै लागु नहुने आदेश गर्न माग गरेका छन् । सर्वोच्चमा दायर रिटमा भनिएको छ, ‘अनिवार्य अवकाश हुने भनी दिइएका पत्रहरुको निवेदनको अन्तिम टुंगो नलागुन्जेल कार्यान्वयन नगर्न अन्तरिम आदेश गरिपाऊँ ।
अवकाश र सेवा अवधिको गणना गर्ने विषय ऐनमा नै तत्काल व्यवस्था गर्न माग गर्दै उनीहरूले अध्यादेश मार्फत कानुन ल्याउन परमादेशको आदेश जारी गर्नुपर्ने माग गरेका छन् ।
