गण्डकी । मुख्यमन्त्री सुरेन्द्रराज पाण्डले एमालेका ४ मन्त्रीको नियुक्ति र मन्त्रालय हेरफेरसँगै मन्त्रिपरिषदलाई पूर्णता दिएका हुन् ।
एमाले केन्द्रीय लेखा आयोग सदस्य पद्मा जिसी श्रेष्ठको नेतृत्वमा गण्डकी प्रदेश सरकारमा सहभागी भएको छ । पद्माले कृषि, भूमि व्यवस्था तथा सहकारी मन्त्रालयको जिम्मेवारी पाउँदा सांसद प्रकाशबहादुर केसी भौतिक पूर्वाधार तथा यातायात व्यवस्था मन्त्री नियुक्त भएका छन् ।
यसअघिका भौतिक पूर्वाधार मन्त्री राजीव गुरुङ (दीपक मनाङे)लाई भने वन तथा वातावरण मन्त्रालयको जिम्मेवारी दिइएको छ । यता सामाजिक विकास मन्त्रालयबाट फुटाइएको स्वास्थ्य मन्त्रालयको जिम्मेवारी बागलुङका कृष्ण पाठकले पाएका छन् । एमालेकै मित्रलाल बस्याल उद्योग, पर्यटन मन्त्री भएका छन् ।
कांग्रेसबाट विन्दुकुमार थापा सामाजिक विकास युवा तथा खेलकुद मन्त्री, आर्थिक मामिलामा डा. गुरुङ यथावत छन् । नेपाल समाजवादी पार्टीका फणीन्द्र देवकोटाले ऊर्जा, जलस्रोत तथा खानेपानी मन्त्रीकै जिम्मेवारी पाएका छन् । केन्द्रीय समीकरण बनेको ठ्याक्कै दुई महिनापछि गण्डकी सरकारको मन्त्रिपरिषदले पूर्णता पाएको हो ।
