बाँके । चिसो मौसमसँगै बढ्दै गएको हुस्सु र रातिको कम दृश्यताका कारण दुर्घटनाको जोखिम बढेपछि यस्तो अभियान सञ्चालन गरिएको हो।
जिल्ला ट्राफिक कार्यालय बाँकेका प्रहरी निरीक्षक पुष्कर पन्तका अनुसार, रिफ्लेक्टिभ स्टिकरले टाढैबाट टल्किने भएकाले सडकमा सवारीसाधनलाई सहजै चिन्ने र दुर्घटनाको जोखिम कम गर्न सहयोग पुग्नेछ। “रिफ्लेक्टिभ स्टिकर टाँस्नुका साथै चालकलाई ट्राफिक नियमबारे जानकारी प्रदान गरिरहेका छौँ। यो अभियान दुर्घटना न्यूनीकरणको लागि प्रभावकारी हुने विश्वास छ,” पन्तले बताउनुभयो।
ट्राफिक प्रहरीले पहिलो चरणमा नेपालगन्ज क्षेत्रबाट अभियान सुरु गरेको छ। वरिष्ठ सई प्रविण आचार्यले ब्याकलाइट नहुने सवारी साधनको पछाडिको भागमा रिफ्लेक्टिभ स्टिकर टाँस्ने कार्य भइरहेको जानकारी दिनुभयो ।उहाँले सबै प्रकारका सवारीसाधनमा स्टिकर टाँस्न निर्देशन दिइसकेको र आगामी दिनमा यसलाई अन्य क्षेत्रसम्म विस्तार गरिने बताउनुभयो।
चिसो मौसममा हुस्सुका कारण दृश्यता कम हुँदा विशेष गरी रातिको समयमा दुर्घटनाको जोखिम उच्च हुने गर्दछ। ट्राफिक कार्यालयका अनुसार, यस्तो अवस्थामा रिफ्लेक्टिभ स्टिकरले सवारी साधनलाई दृश्य बनाउने भएकाले दुर्घटनामा कमी आउनेछ।
यस अभियानले दुर्घटनामा कमी ल्याउन र चालकहरूको चेतना स्तर उकास्न मद्दत पुर्याउने अपेक्षा गरिएको छ। ट्राफिक प्रहरीले सवारी चालकहरूलाई ट्राफिक नियम पालना गर्न आग्रह गर्दै सुरक्षित यात्राका लागि सहयोग गर्न अपिल गरेको छ।
