दाङ । तुल्सीपुर पाँच वटा संघसंस्थाले व्यवसायी आचार्यमाथि आक्रमण गर्ने दोषीलाई हदैसम्मको कार्बाहीको माग गरेका छन् ।
तुलसीपुर होटल व्यवसायी समिति, तुलसीपुर उद्योग वाणिज्य संघ, तुलसीपुर चेम्बर अफ कमर्स, घरेलु तथा साना उद्योग महासंघ तुलसीपुर र होटल व्यवसायी महासंघ लुम्बिनी प्रदेश लगायतका संघसंस्थाले छुट्टाछुट्टै विज्ञप्ती जारी गरी घटनाको निन्दा गर्दै दोषीलाई कानुनी दायरामा ल्याउन जोड दिएका छन् ।
संघसंस्थाहरूले होटल व्यवसायीहरूको सुरक्षाका लागि आवश्यक कदम चाल्न सरकारलाई ध्यानाकर्षण गराउँदै यस्ता घटनाले व्यवसायीक वातावरणमा नकारात्मक प्रभाव पर्ने बताएका छन् ।
‘व्यवसायीमाथि आक्रमण हुनु दुःखद छ ।’ तुलसीपुर होटल व्यवसायी समितिका अध्यक्ष इन्द्रबहादुर बस्नेतले भन्नुभएको छ ।–‘यस्तो घटनाले समाजमा त्रास फैलाउन सक्छ र व्यवसाय सञ्चालनमा समस्या उत्पन्न हुन्छ ।’
तुलसीपुर होटल व्यवसायी समितिका अध्यक्ष इन्द्र बहादुर बस्नेत, तुलसीपुर उद्योग वाणिज्य संघका अध्यक्ष बिनिल केसी र महासचिव केशवराज केसी, तुलसीपुर चेम्बर अफ कमर्शका अध्यक्ष ऋषिराज भण्डारी र महासचिव दुर्गा प्रसाद शर्मा , नेपाल घरेलु तथा साना उद्योग महासंघ तुलसीपुरका अध्यक्ष लाल बहादुर केसी र महासचिव भद्र बहादुर वली र होटल व्यवसायी लुम्बिनी प्रदेशका महासचिव गणेश प्रसाद बेलबासेले छुट्टाछुटै विज्ञप्ती जारी गरी दोषीमाथि कार्बाहीको मागसहित घाइते आचार्यको शिघ्र स्वास्थ्य लाभको कामना गरिएको छ ।
व्यवसायी आचार्यलाई गत मंगलबार राती पौने ९ बजेतिर तुलसीपुर–३ राम्रीस्थित उहाँकै होटल ड्रिम वाटर एण्ड लजमा तुलसीपुर–९ का ३१ वर्षिय मुकुन्द सापकोटाले धारिलो हतियार (ग्रासी) प्रहार गरी घाइते बनाएका हुन् । सामान्य विवादमै आचार्यमाथि ग्रासी प्रहार भएको हो ।
