रुपन्देही । बुटवल जेरि अर्थात् जिलेबी भनेर भन्ने बित्तिकै जसको पनि मुख रसाउँछ । चिल्लोमा पकाएर चिनीको झोलमा डुबाइने हुँदा यो अत्यन्तै गुलियो हुन्छ, तसर्थ सबैले मन पराउनु ठिकै हो ।
रुपन्देही जिल्लामा बुटवल फुलबारी नजिकै एउटा जिलेबी पसल छ । बाजेको जिलेबी पसल भनेर सबैलाई थाहा छ । मासकाे दालबाट बनाउने जिलेबी त्यस पसलको आफ्नो चिनारी हो । वि सं १९७८ मा जिजुबाजे सिताराम हलवाईले शुरु गरेको पसल बाजे लट्टू हलवाई र बुवा किरण प्रसाद हलवाई हुँदै अहिले चौथो पुस्ता अर्थात पनाती सुरज हलवाईले निरन्तरता दिइरहेका छन् ।
दालखाने मासको जिलेबी साथै समौसा, नमकिन जस्ता खानेकुरा र चिया पनि उत्तिकै मीठो पाइन्छ यहाँ बाजेको जिलेबी पसलमा । अचम्म कुरा त के भने एक शताब्दीको एउटा लामो युग पार हुँदासम्म हलवाई परिवारले बाजेको जिलेबी पसल चलाइरहेका छन्, आफ्नो नित्यकर्म ठानेर ।
