दाङ । घोराही आज कामको सिलसिलामा नेपाल पत्रकार महासङ्घ दाङ शाखाको भवनमा पुगेको बेला एक्कासी भेट भयो अजयदीप शर्मासँग ।
पछिल्लो पटक उहाँसँग भेट नभएको धेरै समय भइसकेको थियो । आज बुधबार । उहाँ नौलो जनउभार साप्ताहिक पत्रिका बजारमा वितरण गर्दै त्यहाँसम्म पुग्नुभएको रहेछ ।
जनउभार पत्रिकामा मैले पनि कार्यकारी सम्पादकको रुपमा चार वर्ष काम गरेको थिए । आफूले पहिले काम गरेको पत्रिकाको प्रकाशक/सम्पादक र मेरो पूर्व नेता र निकै माया गर्ने अभिभावक भएको नाताले उहाँले पत्रिका वितरण गरिरहेको दृश्य देखेर म अलि भावुक पनि भए ।
२०५५ सालदेखि जनउभार पत्रिकामा निरन्तर काम गरिरहनु भएका अजयदीप आज पनि आफै पत्रिकाको प्रकाशक/सम्पादक, डिजाइनर र हकर भएर निरन्तर काम गरिरहनुभएको छ ।
करिब १८ वर्ष एउटै संगठनमा रहेर काम गरेको नाताले म अजयदीपलाई भित्रैदेखि राम्रोसँग चिन्छु । इमान्दारिता, लगनशीलता र संगठनमा सबैलाई न्यायोचित ढङ्गले हेर्ने उहाँको मूल विशेषता हो ।
पार्टी/संगठनमा जतिबेला अप्ठ्यारो परिस्थितिको सिर्जना हुन्थ्यो या काम गर्नुपर्ने हुन्थ्यो त्यतिबेला अजयदीपको आवश्यकता बोध हुन्थ्यो । तर, जब अवसर र सुविधाको कुरा आउँथ्यो त्यतिबेला अजयदीपमाथि असक्षमताको विल्ला भिराइन्थ्यो ।
राजनीतिमा लागेको एउटा इमान्दार सिपाहीमाथि यति धेरै अन्याय हुन्छ भन्ने कुराको उदाहरण हो, अजयदीप ।
राजनीतिमा लागेर धेरैका जीवनहरू बदलिए । चप्पल लाउने हरू महलमा पसे । पैदल हिँड्नेहरू पजेरोमा हिँड्न थाले । अजयदीपहरू अहिले पनि निरन्तर राजनीतिमा इमान्दारिताका साथ भविष्यको सपना बोकेर निरन्तर लागिरहेका छन् ।
म विचारले उहाँभन्दा अर्कै परिस्थितिमा गएको छु । तर उहाँले सिकाएको मूल मन्त्र – इमान्दार भएर काम गर, चोखो कमाइमा रमाउँ, सबैलाई न्यायोचित व्यवहार गर । यो कुरा मेरो जीवन होस् या राजनीतिमा सधैँ काम लागिरहनेछ ।
