काठमाडौं । मंगलबार जिल्ला प्रहरी परिसर काठमाडौंमा आयोजित पत्रकार सम्मेलनमा सञ्चारकर्मीहरूले ‘ठमेलमा प्रहरीमाथि कुटपिट गर्ने अखिल नेता कमलराज जोशीलाई उन्मुक्ति दिइएको’ विषयमा प्रश्न गर्दा एसएसपी अधिकारीले भने, ‘हामीलाई पार्टीसँग कुनै सरोकार छैन।’
उनले घटनामा संलग्न पाँच जनामाथि अनुसन्धान अघि बढाइएको र थप संलग्नता देखिए ‘एक हजार प्रतिशत कारबाही’ गरिने प्रतिबद्धता जनाए।
गत बिहीबार नेकपा एमालेको विद्यार्थी संगठन अनेरास्ववियुको स्थायी कमिटी सदस्य कमलराज जोशीसहितको समूहले ड्युटीमा खटिएका प्रहरीलाई कुटपिट गरेको थियो।
घटनामा संलग्न पाँच जनाविरुद्ध पक्राउ पुर्जी जारी गरिएको थियो, तर जोशी भने उन्मुक्ति पाएका थिए।
आइतबार मात्रै प्रहरीमाथि आक्रमण गरेको आरोपमा ताप्लेजुङको फुङलिङ नगरपालिका–१ का २६ वर्षीय दिनेश सिग्देल र डडेल्धुराको गन्यापधुरा गाउँपालिका–५ का २२ वर्षीय रमेश फुलारा पक्राउ परिसकेका छन्। अमृत साइन्स क्याम्पस (अस्कल) मा अध्ययनरत यी दुवै जना नेकपा एमालेको विद्यार्थी संगठनमा आबद्ध रहेको खुलेको छ।
जिल्ला प्रहरी परिसरका एसपी तथा प्रवक्ता अपिलराज बोहराका अनुसार पक्राउ परेका सिग्देल र फुलाराविरुद्ध जिल्ला प्रशासन कार्यालय काठमाडौंबाट अभद्र व्यवहारको कसुरमा पाँच दिनको म्याद लिएर अनुसन्धान अघि बढाइएको छ। पक्राउ पुर्जी जारी गरिएका अन्य तीन जना नवीन ऐरी, सौजन्य शाही र गोपालबहादुर शाही अझै फरार छन्।
घटनाका क्रममा प्रहरी हवल्दार जगुलाल चौधरी र जवान नगेन्द्रराज बिष्ट कुटिएका थिए। दरबारमार्गस्थित केशरमहल बिटबाट ड्युटीमा खटिएको क्विक रेस्पोन्स टोली (क्यूआरटी) लाई जोशीसहितको समूहले आक्रमण गरेको थियो।
प्रहरीलाई सम्झाउन खोज्दा उनीहरू झनै उग्र बनेका थिए। दुई प्रहरीको मोटरसाइकल लडाउँदै लौरोसमेत प्रहार गरिएको खुलासा भएको छ। भिडिओ फुटेजमा जोशीले प्रहरीमाथि औंलो ठड्याउँदै चेतावनी दिएको देखिन्छ।
