काठमाडौं । ललितपुर महानगरपालिकामा लागुऔषध दुर्व्यसनरहित घर अभियान सुरु गरिएको छ । सानेपामा आयोजित समारोहमा ललितपुर महानगरका मेयर चिरिबाबु महर्जन र उपत्यका प्रहरी कार्यालयका एआईजी टेक बहादुर तामाङले समझदारी पत्रमा हस्ताक्षर गरे ।
लागुऔषध दुरुपयोग एवम् ओसारपसार विरुद्धको अन्तर्राष्ट्रिय दिवसको अवसरमा आयोजित समारोहमा ललितपुरका मेयर चिरिबाबु महर्जनले अभियान सफल पार्न लागि पर्ने बताए । उनले भने– ‘सबैलाई धन्यवाद, धेरै राम्रो कामको सुरुवात भएको छ ।’
ललितपुर प्रहरीले एकदमै सराहनीय काम गर्दै आएको उल्लेख गर्दै महर्जनले प्रहरीसँगको सहकार्यमा अभियान सफल पारिने उद्घोष गरेका छन् । कार्यक्रम जिल्ला प्रशासन कार्यालय ललितपुर, जिल्ला प्रहरी परिसर ललितपुर र ललितपुर महानगरपालिकाले आयोजना गरेका हुन् ।
कार्यक्रममा आईजीपी दीपक थापाले लागुऔषध ‘रोग’ भएको बताए । उनले भने, ‘लागुऔषध नियन्त्रण गर्न हामीले विभिन्न अभियान र अपरेसन सञ्चालन गरिरहेका छौँ ।’
ललितपुर महानगरपालिका भित्र सुरु गरिएको लागुऔषध दुर्व्यसनरहित घर अभियानलाई अभियानलाई व्यवस्थित रूपमा लैजान आईजीपी थापाले उपत्यका प्रहरी कार्यालयका एआईजी टेकबहादुर तामाङ र ललितपुरका एसएसपी श्यामकृष्ण अधिकारीलाई निर्देशन दिए ।
