पर्सा । मकवानपुरको मनहरि, लोथर तथा धादिङका पहाडी क्षेत्रहरूमा उत्पादन हुने गाँजा पछिल्ला वर्षहरूमा चितवन र पर्सा राष्ट्रिय निकुञ्ज तथा राष्ट्रिय वन क्षेत्र हुँदै पर्साका विभिन्न स्थानमा भण्डारण गरी भारततर्फ पठाइने क्रम तीव्ररूपमा बढिरहेको छ। सुरक्षा निकायका अनुसार विजयबस्ती, सुवर्णपुर, बाघमोर्चा, गोपीबस्ती, गढुवालाइनलगायतका गाउँहरू पछिल्लो समय गाँजा भण्डारण तथा तस्करीका मुख्य केन्द्रका रूपमा पहिचान भएका छन्।
भारतको बिहार राज्यमा हालै सम्पन्न विधानसभा चुनावका कारण केही समय तस्करी रोकिएको भए पनि परिणाम सार्वजनिकसँगै गाँजा तस्करी फेरि सुचारु भएको सुरक्षा स्रोतले जनाएको छ। चुनावअघि नै ठूलो परिमाणमा मकवानपुर–धादिङबाट ल्याइएका गाँजाहरू पर्साका ग्रामीण बस्तीतिर भण्डारण गरिएको थियो।
निकुञ्ज क्षेत्र र जनता सडकमार्ग हुँदै तस्करी हुने मुख्य मार्ग मनहरि–लोथर–पटेर्वासुगौली रहेको छ। यसका साथै पर्साका सोनवर्षा, कञ्चनपुर, बैरिया, देकुली, देवरिया, मोरटोल, मुजवनिया टोल, जीराभवानी, सखुवनिया, भवानीपुर, महादेवपट्टी, औराहा लगायतका स्थान हुँदै मोटरसाइकल, जीप, भ्यान र भरियामार्फत गाँजा भारत पुर्याइने गरेको छ।
