दाङ । देउखुरीका सामुदायिक वन समूहका अगुवाहरूलाई सामुदायिक वनकाे कार्ययाेजनामा जैविक विविधता र पारिस्थिकीय सेवा समावेश बिषयमा एकदिने कार्यशाला गाेष्ठी देउखुरीकाे लमहीमा सम्पन्न भएकाे छ ।
आइतबार अपरान्ह दाङको देउखुरीस्थित भुसाल होटल एण्ड गेष्ट हाउसको सभाहलमा नेपाल पंक्षी संरक्षण संघ काठमाडौं र डिभिजन वन कार्यालय देउखुरी लमही दाङकाे संयुक्त आयाेजनामा दाङ-देउखुरी चुरे वन तथा पश्चिम राप्ती सिमसार क्षेत्रमा आप्रबासी चराहरूकाे संरक्षणका लागि सामुदायिक वन समूहकाे कार्ययाेजना जैविक विविधता पारिस्थिकीय सेवा सम्बन्धि गाेष्ठी सम्पन्न भएकाे हाे ।
देउखुरीमा रहेका सामुदायिक वन समूहका अगुवाहरूलाई चरा, जैविक विविधता क्षेत्रको बारेमा जानकारी दिई चरा संरक्षण र तिनीहरूको बासस्थानको पनि संरक्षणका लागि सामुदायिक वन समूहहरूले कार्ययाेजनामा समावेशका लागि टेवा पुर्याउने उद्देश्यले यो कार्यक्रमको आयोजना गरिएको संघका परियाेजना अधिकृत भुपाल नेपालीले जानकारी दिए । पंक्षी संरक्षण संघद्वारा सञ्चालित परियोजना तथा महत्त्वपूर्ण चरा र जैविक विविधता क्षेत्र संरक्षण को विषयमा विस्तृत रुपमा अधिकृत नेपालीले जानकारी गराएका थिए ।
उक्त अवसरमा सव-डिभिजन वन कार्यालय लमहीका सहायक वन अधिकृत धुब्रप्रसाद थारूले चरा संरक्षणका लागि सामुदायिक वन समूहले बनाउने कार्ययाेजनामा समावेश गर्नुपर्ने, बनेका कार्ययाेजना फेरबदल गर्ने र कार्य याेजनामा चरा संरक्षणकाे बिषयलाई उच्च प्राथमिकतामा राख्नुपर्ने गरि प्रस्तुतिकरण दिएका थिए । साथै सहभागी सामुदायिक वन समूहका पदाधिकारीहरूले अब बनाउने कार्ययाेजनामा उच्च प्राथमिकता दिएर चरा संरक्षणकाे बिषयबस्तुलाई समावेश गर्नका लागि उपस्थित सबैले प्रतिबद्धता जनाएका छन् ।
सोही कार्यशाला गोष्ठीमा नेपाल पंक्षी संरक्षण संघद्वारा सञ्चालित जिविकाेपार्जन तथा संरक्षण संयाेजन कार्यक्रम अन्तर्गत दाङकाे देउखुरीमा रहेका राजपुर, गढवा गाउँपालिका तथा लमही नगरपालिकाका सात वटा सामुदायिक वन समूहका दुई दर्जनभन्दा धेरै संख्यामा पदाधिकारीहरूको सकृय सहभागिता रहेको थियाे । भने संघका परियाेजन फिल्ड अधिकृत पृथ्वी चाैधरीले कार्यक्रमको सहजीकरण गरेका थिए ।
