बारा । झरओखर र कवलपुर नाकामा पछिल्ला करीब एक महिनादेखि तस्करी गतिविधि तीव्र बनेको स्थानीयहरूले बताएका छन्। उनीहरूको दाबी अनुसार सुरक्षाकर्मीको मिलेमतोमा यी नाकाबाट ठूलो मात्रामा सामान ओसारपसार भइरहेको छ।
स्थानीय स्रोतका अनुसार कपडाको अवैध कारोबारमा संलग्न भनेर चिनिने सिम्रौनगढ–गोलागंज क्षेत्रका भोला साहलाई तस्करीका लागि ‘लाइन’ उपलब्ध गराइँदै आएको छ। साडी, कुर्ता–सलवार, सुटिङ–सटिङ लगायतका रेडिमेड कपडाहरू भारतबाट भित्र्याइ निजगढ र कोल्वी क्षेत्रसम्म पु-याइने गरेको आरोप छ। दैनिक रूपमा लाखौं मूल्यबराबरको कपडा दुबै सुरक्षातन्त्रको मिलेमतोमा सीमा नाकाबाट भित्रिने गरेको स्थानीयको भनाइ छ।
इलाका प्रहरी कार्यालय सिम्रौनगढदेखि सशस्त्र प्रहरी बल जीतपुरस्थित बेशका केही घुमुवासम्म तस्करी जालोमा संलग्न रहेको दाबी पनि गरिन्छ।
पूर्वमा एउटा अप्रेसनमा परेपछि केही समय फरार रहेका साह राजनीतिक पहुँचका कारण कारबाहीबाट जोगिएको स्थानीयको आरोप छ।
यसैबीच बैरिया क्षेत्रमा भारतीय नागरिक अरविन्द साहलाई पनि तस्करीको नयाँ ‘लाइन’ उपलब्ध गराइएको बताइन्छ। अगर्वा नाकाबाट बैरिया र पथलवाघाट मार्ग हुँदै उनले कपडा र किराना सामान भारतबाट नेपालतर्फ ल्याउने र नेपालबाट कस्मेटिक सामग्री भारततर्फ पठाउने कार्य व्यापक भएको स्थानीयको दाबी छ।
सिम्रौनगढको नरवासमा उनले सञ्चालन गरेको कपडाको पसल तस्करीको आड बनेको आरोप पनि छ। केही महिना अघि राजश्व कार्यालयले सामान बरामद गरे पनि मिलेमतोमा छुटेको स्थानीय स्रोतले बताएका छन्।
स्थानीयवासीहरूका अनुसार नेपाल प्रहरी र सशस्त्र प्रहरीको संलग्नता बिना यति ठूलो तस्करी सम्भव नहुने दाबी बलियो बन्दै गएको छ।
