पर्सा । वीरगञ्ज महानगरपालिका वडा नं. ५ का वडाध्यक्ष प्रदीप चौरसियाले एक व्यक्तिको घरमा जबर्जस्ती प्रवेश गरी एक युवतीमाथि कुटपिट तथा हातपात गरेको भिडियो सामाजिक सञ्जालमा सार्वजनिक भएको छ। सार्वजनिक भएको उक्त भिडियोमा वडाध्यक्ष चौरसियाले घरभित्र पसी युवती र उनका परिवार माथि अभद्र व्यवहार गर्दै हातपात गरेको दृश्य देख्न सकिन्छ।
घटनापछि स्थानीयवासी तथा सामाजिक सञ्जाल प्रयोगकर्ताहरूले वडाध्यक्षको यस्तो व्यवहारप्रति कडा आक्रोश व्यक्त गरेका छन्। जनप्रतिनिधिबाटै कानुनविपरीत र हिंसात्मक व्यवहार हुनु गम्भीर विषय भएको भन्दै दोषीमाथि तत्काल छानबिन गरी कानुनी कारबाही गर्न माग गरिएको छ।
यस घटनाले जनप्रतिनिधिको आचरण, जिम्मेवारी र कानूनको पालना सम्बन्धी प्रश्न उठाएको छ। सम्बन्धित निकायले घटनाको निष्पक्ष छानबिन गरी सत्यतथ्य सार्वजनिक गर्नुपर्ने माग तीव्र बन्दै गएको छ।
