दाङ । घोराहीमा नियमित पत्रकार सम्मेलन गरी जिल्ला प्रहरी कार्यालय दाङले चुनावी सुरक्षाका लागि प्रहरी चौबिसै घण्टा परिचालन गरिएको जनाएको छ ।
‘अबदेखि आमसभाका कार्यक्रम पनि छन्, अहिलेसम्म घरदैलोमा मतदाता भेटघाट कार्यक्रम शान्तिपूर्ण नै भए’– दाङका प्रहरी प्रमुख एसपी दीपक श्रेष्ठले भन्नुभयो– ‘अहिलेसम्म दाङमा शान्तिपूर्णरुपमै चुनावी गतिविधि भएका छन्, हामीले पनि मतदाता, उम्मेदवार र राजनीतिक दलका लागि एकीकृत योजनाअनुसार सुरक्षा व्यवस्था गरिसकेका छौं ।’
जिल्लाको शान्ति सुरक्षा र निर्वाचन लक्षित सुरक्षाका लागि नेपाल प्रहरी, नेपाली सेना र सशस्त्र प्रहरीसँगै निर्वाचन प्रहरी पनि खटाइएको छ । दाङमा सुरक्षा जनशक्ति पनि थपिएको एसपी श्रेष्ठले जानकारी दिनुभयो ।
‘खासगरी नेपाल प्रहरी फिल्डमा खटिसकेको छ, कारागार र टरिगाउँ विमानस्थलको सुरक्षाको जिम्मा चुनाव अवधिसम्म नेपाली सेनाले लिएको छ । हामी फिल्डमा खटिएका छौं’– उहाँले भन्नुभयो । प्रहरीले निर्वाचन आचारसंहिताविपरीतका कुनै पनि घटना भएको खबर नआएको जनाएको छ ।
‘हुन त आचारसंहिताको अनुगमन गर्न सहायक प्रमुख जिल्ला अधिकारीको नेतृत्वमा छुट्टै समिति छ’– एसपी श्रेष्ठले भन्नुभयो– ‘तर आचारसंहिता उल्लंघन भएको भन्ने अहिलेसम्म खबर आएको छैन, त्यस्तो कतै देखिए जो कसैले पनि खबर गर्न सक्नुहुनेछ ।’
एसपी श्रेष्ठले एकीकृत सुरक्षा योजना लागु भइसकेकाले सोहीअनुसार निर्वाचनपूर्व हुने सुरक्षा चुनौतीअनुसार काम भइरहेको बताउनुभयो । सो अवसरमा जिल्ला प्रहरी कार्यालय दाङका डिएसपी रेशम बोहराले माघ महिनामा दाङमा भएका प्रहरी गतिविधिबारे जानकारी दिनुभएको थियो ।
