दाङ । घोराही बनाऔं अभियानले घोराही–तुलसीपुर सडक खण्डमा पर्ने फोरलेन सडक निर्माणको कामलाई दु्रतगतिमा अगाडी बढाउन माग गरेको छ । अभियानको टोलीले डिभिजन सडक कार्यालय दाङमा पुगेर फोरलेन सडक र सोही सडकमा बनि रहेका पुल निर्माणको कामलाई पहिलेको भन्दा पनि दु्रत गतिमा अगाडी बढाउन माग गरेको हो । निर्वाचन पछि सडक निर्माणको कार्यमा ढिला सुस्त भैरहेको गुनासोहरु सामाजिक सञ्जालमा बढेको भन्दै अभियानले सम्बन्धित निकायलाई यस कुराको ध्यानाकर्षण गराएको हो ।
घोराही बनाऔं अभियानका संयोजक सविन प्रियासनको नेतृत्वमा डिभिजन सडक कार्यालय पुगेको टोलीले कार्यालयसँग यस विषयमा विशेष छलफल गरेको छ । छलफल पश्चात् अभियानको तर्फबाट कार्यालयलाई ज्ञापनपत्र समेत बुझाईको थियो । डिभिजन सडकका प्रवक्ता इन्जिनियर अशोक चौधरीले ज्ञापनपत्र बुझ्दै समयमा नै फोर लेन सडक र पुल निर्माणको काम सम्पन्न गर्न आफूहरू गम्भीरताका साथ लागिपरेको बताउनुभयो l सो अवसरमा नेपाल पत्रकार महासंघ दाङका पूर्व अध्यक्ष केल बुढाथोकी, उपभोक्ता हित संरक्षण मञ्चका केन्द्रीय सदस्य चिन्तामणि पौडेल, राष्ट्रिय खेलाडी बिरु भाइ बज्राचार्यलगायतको उपस्थिति रहेको थियो l
ज्ञापनपत्रको पूर्ण पाठ ः
श्री डिभिजन प्रमुखज्यू सडक डिभिजन कार्यालय, दाङ
विषय ः घोराही–तुलसीपुर फोरलेन सडकको काम व्यापक बनाउने सम्बन्धमा
महोदय,
दाङ लुम्बिनी प्रदेशको राजधानी भएको जिल्ला हो । दाङको सदरमुकामकारुपमा रहेको घोराही नेपालकै सबै भन्दा ठूलो उपमहानगरपालिका हो । दाङमा घोराही अनि तुलसीपुर गरी दुई वटा उपमहानगरपालिका छन् । यसै सन्दर्भमा घोराही देखि तुलसीपुर जोड्ने फोरलेन सडक निर्माणको काम भैरहेकोमा हामी अति नै खुसी छौं । लामो समयसम्म फोरलेन सडकको काम अल्पत्र हुँदा दाङबासीमा निराशा अनि आक्रोश फैलिएको थियो । जुन यहाँलाई पनि अवगत नै छ ।
विगत केही महिनादेखि घोराही–तुलसीपुर सडक खण्ड अन्तगर्तको फोरलेनको काम, यसैगरी बाँकी रहेका केही खोलामा पुल निर्माणको कामले गति लिइरहेकोमा सबै सरोकारवाला निकायहरुलाई धन्यवाद दिन चाहन्छौं । तर, यसैबीच केही दिन यता फोरलेन सकडको काममा केही सुस्तता आएको जनगुनासोहरु बढ्न थालेको छ । सामाजिक सञ्जालमा बढ्न थालेको गुनासोले जनतामा निराशा उत्पन्न भए जस्तो आभाष हामीले समेत महसुस गरिरहेका छौं । तसर्थ फोरलेन सडक र केही खोलाहरुमा जारी पुल निर्माणको कामलाई पहिलेको भन्दा पनि दु्रत गतिमा अगाडी बढाएर समय अगाडी नै फोरलेन सडक र पुल निर्माणको काम सकिने छ भन्ने सन्देश प्रवाह गरी उत्साह थप्ने काममा यहाँहरु घनिभूतरुपमा लागि रहनुहुनेछ भन्ने जोडदार मागसहित खबरदारी पत्र पेश गर्दछौं । फोरलेन सडक लगायत अन्य विकास निर्माणसँग सम्बन्धित कार्यहरुलाई सार्थक बनाउन अभियानको तर्फबाट सधैभरी सकारात्मक साथसहयोग हुने समेत जानकारी गराउँदछौं ।
सविन प्रियासन
(संयोजक)
घोराही बनाऔं अभियान
